Diogelu

Ar y dudalen hon:

Rheoli honiadau / Pryderon yn erbyn gwesteiwyr o dan y Cynllun Cartrefi i Wcráin

Mae pobl sy'n cyrraedd o Wcráin mewn perygl o brofi'r pedwar prif fath o gaethwasiaeth fodern: cam-fanteisio ar lafur, cam-fanteisio troseddol, cam-fanteisio rhywiol, a chaethwasanaeth domestig.

Mae yna lawer o wahanol arwyddion o gaethwasiaeth fodern sy'n dibynnu ar y math o gam-fanteisio. Mae Unseen UK wedi cynhyrchu gwybodaeth am arwyddion caethwasiaeth fodern (yn agor mewn tab newydd) i gadw golwg amdanynt. Mae yna lawer o adnoddau rhad ac am ddim ar gaethwasiaeth fodern (yn agor mewn tab newydd)

Mae gwybodaeth ac adnoddau hygyrch ac amlieithog ar gaethwasiaeth fodern hefyd ar gael mewn ffynonellau ar-lein gan gynnwys y canlynol:

Os oes gennych unrhyw bryderon ynglŷn â chaethwasiaeth fodern, ffoniwch Llinell Gymorth Caethwasiaeth Fodern a Chamfanteisio ar 08000 121 700 neu adrodd eich pryderon ar-lein (yn agor mewn tab newydd).

Os byddwch yn dod yn ymwybodol bod gwestai o Wcráin wedi mynd ar goll o'ch safle, dylech gysylltu â'r awdurdod lleol a all wneud ymholiadau a dilyn y weithdrefn ar gyfer pobl ar goll.

Os oes gennych unrhyw bryderon am ddiogelwch neu lesiant eich gwesteion o Wcráin, cysylltwch â'r awdurdod lleol i godi'r pryderon hyn mewn modd cyfrinachol.

Hyfforddiant Diogelu

Nid oes unrhyw ddisgwyliad y byddwch yn cwblhau'r hyfforddiant hwn ond gan y bydd rhai Wcreniaid wedi dioddef trawma ac y gallent fod yn agored i niwed, efallai y bydd eich staff yn dymuno cael mynediad i'n hyfforddiant rhad ac am ddim ar ddiogelu ac arfer sy'n ystyriol o drawma.

Modiwl Hyfforddiant Diogelu Ar-lein. Mae hwn ar gael gan ddefnyddio Google Chrome fel porwr gwe: Cwrs: Hyfforddiant Diogelu – Cefnogi Ffoaduriaid Wcráin yng Nghymru (yn agor mewn tab newydd) Ewch i mewn fel gwestai i gael mynediad am ddim.

Mae hyfforddiant rhagarweiniol gwasanaethau sy'n ystyriol o drawma (yn agor mewn tab newydd)

Rheoli Honiadau / Pryderon yn erbyn gwesteiwyr o dan y Cynllun Cartrefi i Wcráin

Efallai y bydd achlysur pan fydd rhywun yn gwneud honiad neu'n codi pryder yn eich erbyn. Mae Llywodraeth Cymru yn ystyried bod gwesteiwr sy'n lletya yn wirfoddolwr ac yn berson mewn safle o ymddiriedaeth, fel y nodir yn adran 5 o Weithdrefnau Diogelu Cymru 2019.

Gall gwesteiwr ar ryw adeg ddod yn destun honiad ei fod wedi achosi niwed i oedolyn neu blentyn mewn perygl, sef:

Gall gwesteiwr fod wedi ymddwyn mewn ffordd sydd wedi niweidio neu a allai fod wedi niweidio oedolyn neu blentyn mewn perygl
Cyflawni trosedd o bosibl yn erbyn plentyn neu oedolyn mewn perygl neu un sydd wedi cael effaith uniongyrchol ar y plentyn neu oedolyn mewn perygl
Ymddwyn tuag at blentyn neu oedolyn mewn perygl mewn ffordd sy’n dangos ei fod yn anaddas i fod yn westeiwr

Mae gan yr awdurdod lleol ddyletswydd i reoli honiadau a phryderon ynghylch gwesteiwyr, a gwneir hyn gan Swyddog Dynodedig yr Awdurdod Lleol.

Mae diogelu yn fusnes i bawb. Rhaid i unrhyw un sy'n dod yn ymwybodol o honiad / pryder adrodd eu pryderon i’r gwasanaethau cymdeithasol a/neu’r heddlu.

Beth sy'n digwydd pan wneir honiad / pan godir pryder?

Lle gwneir honiad / codir pryder bod plentyn neu oedolyn wedi cael ei niweidio, bydd Swyddog Dynodedig yr Awdurdod Lleol yn trafod â rheolwr Tîm Asesu Gofal Plant y gwasanaethau cymdeithasol neu reolwr y Tîm Diogelu Oedolion ac yn penderfynu pa gamau pellach a gymerir a beth a ddywedir wrthych am yr honiad a wneir yn eich erbyn.

Pa gamau y gellir eu cymryd?

Bydd y gwasanaethau cymdeithasol a'r heddlu yn penderfynu p'un a oes angen i'r heddlu a'r gwasanaethau cymdeithasol gynnal ymchwiliad llawn.

Mewn rhai achosion, gall yr heddlu benderfynu bwrw ymlaen ag ymchwiliad troseddol, efallai y cewch eich cyfweld dan rybudd neu eich gwahodd i gynorthwyo’r heddlu â’u hymholiadau. Mae gennych hawl i gynrychiolaeth gyfreithiol y gellir ei threfnu gan yr heddlu yn yr orsaf.

Ymchwiliad mewnol

Mae'n bosibl y bydd angen i'r adran Cartrefi i Wcráin o fewn yr awdurdod lleol gynnal ymchwiliad mewnol a chwblhau asesiad risg. Gall hyn olygu y bydd angen symud eich gwesteion o'ch cartref nes bod y broses wedi dod i ben a bod yr achos wedi dod i ganlyniad.

Cymorth

Gall y broses hon fod yn amser llawn straen a phryder, bydd eich gweithiwr arweiniol neu swyddog enwebedig yn cynnig cefnogaeth i chi drwy gydol y broses ac yn eich cyfeirio at wasanaethau eraill os oes angen.

Cadw cofnodion

Bydd cofnod cynhwysfawr yn cael ei gadw yn eich ffeil bersonél cyfrinachol a’i gadw yn unol â gofynion y Rheoliad Cyffredinol ar Ddiogelu Data. Mae hyn yn cynnwys ymchwiliadau nas profwyd.

Y Gwasanaeth Datgelu a Gwahardd / Llywodraeth Cymru / Llywodraeth y DU

Mae gan yr awdurdod lleol ddyletswydd statudol i roi gwybod i’r Gwasanaeth Datgelu a Gwahardd / Llywodraeth Cymru / Llywodraeth y DU os oes penderfyniad wedi’i wneud i ddod â’ch rôl fel gwesteiwr i ben yn seiliedig ar ganlyniad yr ymchwiliad.

Rhoi gwybod am drosedd rhyfel

Os ydych chi wedi bod yn ddioddefwr neu’n dyst i drosedd rhyfel, rhowch wybod i’r Heddlu Metropolitanaidd gan eu bod yn cynorthwyo ymchwiliad y Llys Troseddol Rhyngwladol (ICC) i droseddau rhyfel posibl, hil-laddiad a throseddau yn erbyn dynoliaeth yn Wcráin. Mae’r Tîm Troseddau Rhyfel yn rhan o Drefn Rheoli Gwrthderfysgaeth yr Heddlu Metropolitanaidd.

Gallai eich gwybodaeth fod yn hanfodol i ymchwiliad yn y Deyrnas Unedig neu ran arall o’r byd.

Byddant yn trin yr holl wybodaeth a rowch yn gwbl gyfrinachol.

Os nad ydych yn siŵr beth yr ydych am ei ddweud wrthym yw trosedd rhyfel, darllenwch beth sy’n gwneud trosedd yn drosedd rhyfel (yn agor mewn tab newydd).

Sylwer: gallwch gysylltu â nhw yn eich iaith gyntaf neu pa bynnag iaith rydych chi’n teimlo’n fwyaf cyfforddus yn ei defnyddio. Nid oes rhaid i’ch adroddiad fod yn Saesneg.

Am ragor o wybodaeth, ewch i Rhoi gwybod am drosedd rhyfel (yn agor mewn tab newydd)

Canolfan Wybodaeth i Noddwyr