Cronfa Ffyniant Gyffredin y DU
Grant Tyfu Busnes - Canllawiau a Sut i Wneud Cais
Ar y dudalen hon:
4. Yr hyn y gallwch ddefnyddio'r grant ar ei gyfer
5. Yr hyn na allwch ddefnyddio'r grant ar ei gyfer
11. Yn dilyn cwblhau- Telerau ac amodau
Canllaw yn unig yw’r wybodaeth a ddangosir yma, ac mae telerau ac amodau cyfreithiol y grant wedi’u nodi yn llythyr cynnig y ceisiadau cymeradwy. Mae’r canllawiau ar ffurf ddrafft o hyd ac yn agored i newid.
1. Cyflwyniad
Fel rhan o’n hymrwymiad parhaus i gefnogi datblygiad economaidd a busnesau drwy gydol y cyfnod heriol hwn, mae Cyngor Sir Penfro yn darparu Grant Twf Busnes Sir Benfro, a ariennir gan Lywodraeth y DU, drwy’r Gronfa Ffyniant Gyffredin.
Nod yr ymyriad grant yw cryfhau ecosystemau entrepreneuraidd lleol a chefnogi busnesau ar bob cam o’u datblygiad i ddechrau, cynnal, tyfu ac arloesi, gan gynnwys trwy rwydweithiau lleol.
Bydd y grant yn cefnogi busnesau lleol a mewnfuddsoddwyr i dyfu, ffynnu ac i fod yn gynaliadwy, gan arwain at greu a diogelu swyddi ledled y sir, a thrwy hynny, gwella’r economi leol. Er y rhoddir blaenoriaeth i greu swyddi newydd, cydnabyddir bod diogelu swyddi yn yr hinsawdd economaidd bresennol hefyd yn hynod o bwysig. Felly, bydd pob achos yn cael ei dafoli’n unigol gan ystyried hynny.
Bydd modd gwneud cais am y grant rhwng mis Ebrill 2025 a mis Medi 2025, neu hyd nes y bydd y gronfa wedi’i dyrannu’n llawn.
Bydd y gronfa yn gynllun grant busnes, a fydd yn cynnwys cymorth tuag at brosiectau gwariant cyfalaf a gwariant refeniw arbenigol (heb gynnwys costau rhedeg parhaus) lle mae swyddi newydd yn cael eu creu a/neu eu diogelu oherwydd y cymorth ariannol.
Mae manylion y canllawiau ymgeisio ar ffurf ddrafft a gallant newid
2. Y cynnig
- Mae grantiau ar gael rhwng £1,000 a £32,500
- Bydd pob grant a ddyfernir yn seiliedig ar 50% o gostau cymwys neu uchafswm o £5,000 fesul swydd *a grëwyd a/neu £5,000 y swydd. *yn ddiogel, pa un bynnag sydd leiaf. (Rhaid creu o leiaf un swydd newydd a/neu ddiogelu un swydd gyfwerth ag amser llawn, er mwyn cael mynediad at y grant).
- I hawlio bod swydd yn cael ei diogelu, bydd rhaid profi y byddai’r swydd yn cael ei cholli o fewn chwe mis i’r cais os na chymerir unrhyw gamau i’w diogelu. Bydd angen rhoi tystiolaeth fanwl o hyn yn y cais.
- Ystyrir dwy swydd ran-amser fel un swydd gyfwerth ag amser llawn. Os ydych ond yn creu neu’n diogelu swydd ran-amser (isafswm o 16 awr yr wythnos) dim ond ar sail pro rata y telir y grant, h.y. uchafswm o £2,500 ar gyfer swydd ran amser.
- Rhaid hawlio pob swydd a grëwyd fel rhan o’r grant o fewn tri mis i ddyddiad y taliad grant terfynol, neu erbyn 30 Tachwedd 2025, pa un bynnag yw’r dyddiad cynharaf.
- Rydym yn annog bod yr holl swyddi sy’n cael eu creu gyda chymorth y grant yn cael y cyflog byw gwirioneddol (yn agor mewn tab newydd).
- Mae’n bwysig nodi bod grantiau’n cael eu talu’n ôl-weithredol. Mae’n rhaid bod gan ymgeiswyr y modd ariannol i brynu’r eitem(au) yn llawn ymlaen llaw, ac yna hawlio gwerth y grant gan Gyngor Sir Penfro gan ddilyn y broses hawlio.
- Rhaid cyflwyno’r ddau hawliad o fewn tri mis i ddyddiad y llythyr cynnig, neu erbyn 31 Hydref 2025, pa un bynnag yw’r dyddiad cynharaf. I gefnogi llif arian, bydd y tîm grant yn ystyried cyflwyno dau hawliad, ond mae’n rhaid ceisio cytundeb ymlaen llaw gan y cyngor.
- Mae’n rhaid i bob taliad a wnaed ar gyfer gwariant cymwys gael ei ddangos trwy gopi o’r anfoneb a phrawf o’r treuliau. (Dim ond trwy ddarparu cyfriflen banc sy’n dangos taliad llawn yn mynd allan o’r cyfrif i’r cyflenwr y gellir dangos tystiolaeth o’r treuliau).
3. Cymhwysedd
Ariennir Grant Twf Busnes Sir Benfro gan Lywodraeth y DU drwy’r Gronfa Ffyniant Gyffredin, a chaiff ei ddarparu gan Gyngor Sir Penfro. Dim ond i fusnesau newydd neu fusnesau sydd eisoes yn bodoli mewn sectorau cymwys sydd ar hyn o bryd yn Sir Benfro, neu sy’n bwriadu symud i Sir Benfro, y mae ar gael.
Bydd modd gwneud ceisiadau am y grant rhwng mis Ebrill 2025 a mis Medi 2025, neu hyd nes y bydd y gronfa wedi’i dyrannu’n llawn.
Mae’r cymorth wedi’i anelu’n bennaf at fusnesau sydd eisoes yn bodoli, sy’n bwriadu gweithredu yn y sectorau twf a sylfaen canlynol, neu sy’n bwriadu gwasanaethu’r sectorau hyn:
- Deunyddiau a gweithgynhyrchu uwch
- Adeiladu
- Y diwydiannau creadigol
- Ynni a’r amgylchedd
- Gwasanaethau ariannol a phroffesiynol
- Technoleg gwybodaeth a thelathrebu
- Gwyddorau bywyd
- Bwyd a diod
- Twristiaeth
- Manwerthu
- Gofal
Fodd bynnag, bydd ceisiadau’n cael eu hystyried fesul achos yn amodol ar eu cyfraniad posibl a’u gwerth i’r economi leol, e.e. lle maent yn creu swyddi yng nghanol prif drefi a threfi llai y sir, ac mewn ardaloedd gwledig, a lle maent yn cysylltu â phrosiectau strategol allweddol.
Nid yw’r sectorau / busnesau / prosiectau canlynol yn gymwys am gymorth:
- Cynhyrchu amaethyddiaeth sylfaenol
- Coedwigaeth
- Pysgota
- Gwasanaethau statudol, e.e. iechyd ac addysg sylfaenol
- Gweithdrefnau iechyd ymyrrol heb eu rheoleiddio
- Unrhyw fusnes sy’n cyflogi mwy na 250 o weithwyr
- Unrhyw fusnes sydd â throsiant o fwy na £50 miliwn
- Unrhyw fusnes neu brosiect grant arfaethedig heb ganiatâd cynllunio angenrheidiol
Mae’r gronfa ar gael i fusnesau o unrhyw faint sydd â’r nod o roi eu cynlluniau twf ar waith, ac mae’n rhaid i’r cynlluniau hyn arwain at greu swyddi newydd neu ddiogelu rhai sydd eisoes yn bodoli. Felly, mae’n rhaid i ymgeiswyr ddangos eu cynlluniau twf (a darparu tystiolaeth lle bo’n berthnasol) yn ystod y broses ymgeisio.
Rhaid prynu a hawlio’r holl wariant sy’n gysylltiedig â’r grant
o fewn tri mis i ddyddiad y llythyr cymeradwyo, neu ddim hwyrach na 31 Hydref 2025, pa un bynnag sydd gynharaf. Ni roddir estyniad amser ar gyfer cyflwyno’r hawliad. Mae’n rhaid creu’r busnes arfaethedig, a’r swyddi cysylltiedig, o fewn chwe mis i daliad terfynol y grant, neu erbyn 30 Tachwedd 2025, pa un bynnag sydd gynharaf.
Bydd y busnes a’r swyddi a grëwyd yn cael eu monitro a bydd angen tystiolaeth. Gallai methu â chyflawni’r allbynnau yr ymrwymwyd iddynt arwain at orfod talu’r arian grant yn ôl.
Ar ôl rhoi rhybudd rhesymol, mae Cyngor Sir Penfro yn cadw’r hawl i fonitro a chynnal tystiolaeth ymhen un flwyddyn, tair blynedd a phum mlynedd o gael cais am grant.
4. Yr hyn y gallwch ddefnyddio’r grant ar ei gyfer
Bydd y grant yn gymwys ar gyfer gwariant cyfalaf a/neu refeniw mewn prosiect cymeradwy a gall gynnwys y canlynol:
Gwariant cyfalaf:
- Prynu offer newydd neu ail-law, e.e. offer, peiriannau, offer arbenigol, ac ati. Sylwch y gallai offer gynnwys eitemau megis wagenni fforch godi, llwythwyr telesgopig, peiriannau tyrchu, ac ati. Nid yw cerbydau cyffredinol, megis faniau a cheir yn gymwys. **Gweler y nodyn isod ynglŷn â phrynu eitemau ail-law.
- Prynu a gosod offer i greu neu wella gofod masnachu awyr agored, e.e. llochesi, gasebos, ac ati. Sylwch y bydd angen i chi ddarparu tystiolaeth o’r caniatadau perthnasol, os yw’n briodol, h.y. caniatâd cynllunio, trwyddedau, ac ati.
- Caledwedd TG a thelathrebu os yw’n gysylltiedig yn uniongyrchol â chyflawni’r prosiect.
Gwariant refeniw arbenigol:
- Hyfforddiant arbenigol / technegol (ddim o reidrwydd wedi’i achredu)
- Comisiynu / gosod peiriannau
- Meddalwedd arbenigol
- Creu gwefannau, e-fasnach / siopau ar-lein, apiau, ac ati
- Mae’n rhaid creu gwefannau a datblygiadau e-fasnach sy’n gysylltiedig â’r grant yn ddwyieithog
- Deunyddiau hyrwyddo a marchnata fel rhan o gynllun marchnata cyflawn (a asesir fesul achos)
- Mae’n rhaid cynhyrchu pob deunydd marchnata a deunydd hyrwyddo yn ddwyieithog
- Ymgynghorwyr arbenigol (a asesir fesul achos)
- Tystysgrif sicrhau ansawdd (a asesir fesul achos)
- Taliadau sy’n gysylltiedig â danfon unrhyw offer cyfalaf
5. Yr hyn na allwch ddefnyddio’r grant ar ei gyfer
Mae gwariant anghymwys yn cynnwys y canlynol:
- Gwariant refeniw cyffredinol, megis costau staff neu unrhyw drethi eraill, hurbwrcas / prynu ar les
- Gwaith adeiladu mawr (yn amodol ar achos busnes ar gyfer gwaith ategol i eitemau a gymeradwywyd)
- Costau atgyweirio, cynnal a chadw ac addurno (yn amodol ar waith ategol achos busnes)
- Amnewid gosodiadau a ffitiadau presennol (yn amodol ar waith ategol achos busnes)
- Ffioedd a chostau ar hap yr ymrwymwyd iddynt neu a wariwyd cyn cynnig a derbyn y grant
- Cerbydau cyffredinol, megis ceir a faniau
- Costau cyfalaf gweithio, megis stoc, rhent, ardrethi, gweinyddu
- Aelodaeth o gyrff llywodraethu ac ymlyniad iddynt
- Costau unrhyw waith sy’n cael ei wneud fel gofyniad statudol cyfreithiol, gan gynnwys caniatâd cynllunio
- Astudiaethau dichonoldeb
- Os yw’r busnes wedi’i gofrestru ar gyfer treth ar werth (TAW), ni fydd TAW yn gymwys. Bydd rhaid i gwmnïau nad ydynt wedi’u cofrestru ar gyfer TAW dalu TAW
- Ni ddylid gwario unrhyw gyllid cyn bod y grant yn cael ei gymeradwyo, gan na ellir dyfarnu’r grantiau yn ôl-weithredol
- Ni fydd pryniannau arian parod (neu ag arian parod / cardiau rhodd) yn cael eu hystyried ar gyfer taliad grant
- Ni fydd eitemau a brynir ar les, hurbwrcas, cytundeb credyd estynedig / les cyllid yn cael eu hystyried ar gyfer cyllid grant
- Ffioedd proffesiynol sy’n gysylltiedig ag ymgynghorwyr busnes cyffredinol, yn cynnwys cynlluniau busnes / ysgrifennu cynigion ar gyfer ardaloedd gwella busnes, ac unrhyw ffioedd sy’n gysylltiedig â chwblhau cais at ddibenion grantiau
- Unrhyw fusnes neu brosiect grant arfaethedig heb ganiatâd cynllunio angenrheidiol
6. Offer ail-law
Mae costau prynu offer ail-law yn gymwys am grant o dan yr amodau canlynol:
- Mae’n rhaid i werthwr yr offer ddarparu datganiad yn nodi eu tarddiad, a chadarnhau na chawsant eu prynu ar unrhyw adeg yn ystod y saith mlynedd diwethaf gyda chymorth grantiau cenedlaethol neu grantiau Ewropeaidd
- Ni ddylai pris yr offer fod yn fwy na’u gwerth ar y farchnad a rhaid iddo fod yn llai na chost offer newydd tebyg
- Mae’n rhaid i’r offer feddu ar y nodweddion technegol sy’n angenrheidiol ar gyfer y gweithrediad, a chydymffurfio â normau a safonau cymwys, e.e. iechyd a diogelwch
7. Ceisiadau ac asesu
Bydd pob cais sydd wedi’i gwblhau yn cael ei ystyried ar sail y cyntaf i’r felin hyd nes y bydd cyfanswm y gronfa wedi’i ddyrannu’n llawn.
Bydd pob cais yn cael ei asesu yn erbyn allbynnau a deilliannau’r prosiect grant; hynny yw:
- Cymhareb gwerth am arian / grant fesul swydd a grëwyd, a buddsoddiad sector preifat a ysgogwyd gan y grant, yn ogystal â hyfywedd y cynllun busnes
- Swyddi a grëwyd
- Swyddi a ddiogelwyd
- Nifer y busnesau sy’n weithredol mewn marchnadoedd newydd
- Nifer y cynhyrchion newydd sy’n cael eu cyflwyno i’r farchnad
I ddechrau, mae’n ofynnol i ymgeisydd gyflwyno datganiad o ddiddordeb. Bydd y datganiad o ddiddordeb wedyn yn cael ei asesu at ddibenion cymhwysedd, ac os caiff ei gymeradwyo, fe’ch gwahoddir i gyflwyno cais llawn.
Yna bydd angen i bob ymgeisydd gwblhau a dychwelyd y canlynol:
- Ffurflen gais wedi’i chwblhau
- O leiaf ddwy flynedd o gyfrifon hanesyddol ynghyd â chyfrifon rheoli diweddar, os ydynt ar gael. Os nad yw busnes wedi bod yn masnachu ers dwy flynedd, mae’n rhaid darparu cyfrifon rheoli a/neu grynodeb incwm a gwariant o’r dyddiad dechrau masnachu hyd at y dyddiad ymgeisio.
- Rhagolygon dwy flynedd (llif arian a/neu elw a cholled)
- Dyfynbrisiau ysgrifenedig (gweler isod am ganllawiau)
Dylid nodi bod Cronfa Twf Busnes Sir Benfro yn grant dewisol ac yn amodol ar gymeradwyaeth gan Gyngor Sir Penfro. Bydd pob cais yn cael ei asesu gan banel sy’n cyfarfod yn fisol i ystyried ceisiadau sy’n cyrraedd y safon erbyn y dyddiad cau penodol.
Sylwer – Bydd angen symud ymlaen â cheisiadau cyn iddynt gael eu cyflwyno i’r panel, felly rhaid cadarnhau gofynion hanfodol megis arian cyfatebol, caniatâd cynllunio (lle bo’n berthnasol) ac ati cyn y bydd y tîm grant yn paratoi’r cais i’w ystyried gan y panel.
8. Rheolau caffael
a) Canllawiau caffael Cronfa Ffyniant Gyffredin Cyngor Sir Penfro 2025-2026 ar gyfer gwerth yn is na £90,000
(yn cynnwys TAW) i’w ddefnyddio gyda chynlluniau grant angori y Gronfa Ffyniant Gyffredin yn Sir Benfro
Cyn caffael nwyddau a gwasanaethau a gynhwysir yn eich ceisiadau grant, disgwylir i ymgeiswyr gynnal y broses o roi dyfynbris mewn modd sy’n sicrhau didwylledd, gwerth am arian a thegwch, a rhaid iddynt ddilyn y gweithdrefnau caffael fel y’u hamlinellir yn yr adran hon.
Cost yr eitem neu gontract â gwerth cyfanredol o hyd at £999 (yn cynnwys TAW)
- Rhaid cael un dyfynbris a’i gadw.
- Rhaid sicrhau’r gwerth gorau am arian a chymryd gofal rhesymol i gael nwyddau neu wasanaethau o ansawdd priodol am bris cystadleuol.
Cost yr eitem neu gontract â gwerth cyfanredol rhwng £1,000 ac £11,999 (yn cynnwys TAW)
- Rhaid ceisio o leiaf ddau ddyfynbris o ffynonellau cystadleuol. Rhaid i’r dyfynbrisau fod yn seiliedig ar yr un manylion a’u gwerthuso ar sail tebyg am debyg.
- Rhaid sicrhau’r gwerth gorau am arian a chymryd gofal rhesymol i gael nwyddau neu wasanaethau o ansawdd priodol am bris cystadleuol.
Cost yr eitem neu gontract â gwerth cyfanredol rhwng £12,000 a £29,999 (yn cynnwys TAW)
- Rhaid ceisio o leiaf dri dyfynbris o ffynonellau cystadleuol. Rhaid i’r dyfynbrisau fod yn seiliedig ar yr un manylion a’u gwerthuso ar sail tebyg am debyg.
- Rhaid sicrhau’r gwerth gorau am arian a chymryd gofal rhesymol i gael nwyddau neu wasanaethau o ansawdd priodol am bris cystadleuol.
Gwerth y contract rhwng £30,000 ac £89,999 (yn cynnwys TAW)
- Ceisiwch dri dyfynbris cystadleuol gan ddefnyddio dyfynbrisiau cyflym GwerthwchiGymru os yw’n gorff cyhoeddus.
- Os nad yw’n gorff cyhoeddus, dangoswch fod tri dyfynbris wedi’u cael o’r farchnad agored. I wneud hyn, rhaid i chi hysbysebu eich gofyniad yn y wasg ranbarthol neu arbenigol gan nodi dyddiad cau ar gyfer cyflwyno dyfynbrisiau, a thrwy hynny rhoi dyfynbris cyfle i’r farchnad agored. Dylai’r dyddiad cau cynharaf fod 14 diwrnod o’r dyddiad cyhoeddi. Fodd bynnag, gallai hyn fod yn hirach os yw’r eitemau’n arbenigol neu’n gymhleth, neu os ydych yn ystyried bod cyfnod rhybudd hirach yn briodol.
- Rhaid cofnodi’n ddogfennol y dyfynbrisiau a geisir, y broses werthuso a’r penderfyniad i ddyfarnu.
Osgoi gwrthdaro buddiannau gyda dyfynbrisiau
Rhaid esbonio unrhyw wrthdaro buddiannau canfyddedig neu wirioneddol rhyngoch chi a’r cyflenwyr y gofynnir iddynt ddarparu dyfynbrisiau, e.e. cael dyfynbrisiau gan gwmnïau cysylltiedig, yn y dogfennau ategol. Os yw gwrthdaro’n bosibl, rhaid cymryd camau lliniaru a’u dogfennu.
b) I’w defnyddio gyda chynlluniau grant angori y Gronfa Ffyniant Gyffredin yn Sir Benfro gydag eitemau neu gontract dros £90,000
Dim ond ar gyfer contractau neu eitemau unigol gwerth mwy na £90,000 (yn cynnwys TAW) y bwriedir y canllawiau hyn, lle mae % o gyfanswm y gwerth i’w ad-dalu gan grant y Gronfa Ffyniant Gyffredin trwy Gyngor Sir Penfro.
Rhaid dilyn y gofynion canlynol ar gyfer prynu nwyddau neu wasanaethau, gwerth rhwng £90,000 a £4,104,393, yn cynnwys TAW, er mwyn dangos cystadleuaeth lawn ac agored.
Rhaid i chi ddangos eich bod wedi defnyddio arferion agored a theg trwy ddefnyddio ymarfer tendro cystadleuol ar gyfer yr holl waith, nwyddau a gwasanaethau sydd wedi’u cynnwys yn y prosiect yr ydych yn bwriadu hawlio cymorth grant ar ei gyfer o fewn yr ystod costau uchod.
I ddechrau, bydd angen tri dyfynbris cystadleuol cyn cymeradwyo’r grant i ddangos costau dangosol y cynllun.
Os yw gwerth contract neu eitem unigol yn fwy na £90,000 rhaid cynnal proses dendro agored i sicrhau cystadleuaeth deg ac agored. Rhaid i hon ddigwydd ar ôl i’r dyfarniad gael ei gymeradwyo ond cyn comisiynu’r gwaith.
Rhaid hysbysebu eich bwriad i gaffael contract neu eitemau dros £90,000 yn y wasg ranbarthol neu arbenigol, gan nodi dyddiad cau ar gyfer cyflwyno tendrau a rhoi cyfle i gwmnïau dendro. Dylai’r dyddiad cau cynharaf fod 14 diwrnod o’r dyddiad cyhoeddi, ond gallai hyn fod yn hirach os yw’r eitemau’n arbenigol neu’n gymhleth, neu os ydych yn ystyried bod cyfnod rhybudd hirach yn briodol. (Gellir cynnwys costau’r broses dendro yn eich dyfarniad grant os na chyrhaeddir y trothwyon uchaf ar gyfer y cynllun grant penodol hwnnw).
Rhaid rhoi’r dogfennau gwahoddiad i dendro i bob cwmni sy’n ymateb i’r hysbysiad contract.
Rhaid i’r gwahoddiad i dendro gael ei gyhoeddi o fewn pum niwrnod i gais ddod i law am y dogfennau, a’i gyhoeddi’n electronig yn achos cyfnod rhybudd byr o 14 diwrnod.
Unwaith y bydd y contract wedi’i hysbysebu, gallwch hefyd gysylltu â chyflenwyr yn uniongyrchol, ond mae’n rhaid darparu tystiolaeth sy’n dangos pa gyflenwyr y cysylltwyd â hwy ac y gofynnwyd iddynt dendro. Mae’n rhaid i hyn gynnwys y dyddiad y cysylltwyd â hwy ac at bwy yn y cwmni yr anfonwyd yr ymholiad atynt.
Rhaid i’r dogfennau tendro gynnwys yr holl wybodaeth angenrheidiol er mwyn i’r cyflenwr gael ei adnabod, gan gynnwys cyfeiriad, manylion cyswllt a rhif cofrestru’r cwmni (rhif TAW os yn berthnasol). Ni ellir rhannu cost eitem a gaffaelir gan y cyflenwr yn symiau llai er mwyn osgoi defnyddio’r gofyniad tendro cystadleuol cywir. Ni ellir rhannu contract y cytunwyd arno neu ddyfynbris / tendr a gyflwynwyd a thynnu eitemau unigol allan o’r contract neu allan o’r dyfynbris i’w darparu ar wahân. Daw hwn yn bryniant newydd a rhaid cymhwyso’r gofynion tendro cystadleuol eto.
Gwrthdaro buddiannau – rhaid esbonio unrhyw wrthdaro buddiannau canfyddedig neu wirioneddol rhyngoch chi a’r cyflenwyr y gofynnir iddynt ddarparu dyfynbrisiau / tendrau, e.e. cael dyfynbrisiau gan gwmnïau cysylltiedig, yn y dogfennau tendro cystadleuol ategol. Lle bo gwrthdaro posibl, rhaid cymryd camau lliniaru a’u dogfennu.
Mae’n rhaid i chi roi proses ar waith sy’n asesu rhinweddau’r tendrau yn ddiduedd (achos busnes, gyda rhagamcan gwirioneddol o gost ac angen). Mae’n rhaid i ddisgrifiad y contract fod yn anwahaniaethol. Ni allwch gyfeirio at frand, cymhwyster, ardystiad, tarddiad neu nod masnach penodol. Rhaid i chi ei gwneud yn glir y bydd y cyfwerth yr un mor ddilys. Rhaid i chi sicrhau nad oes unrhyw wahaniaethu uniongyrchol nac anuniongyrchol ar gynigwyr. Rhaid darparu’r holl wybodaeth ymlaen llaw, gan gynnwys amcangyfrif o werth lle bo modd, yn y cyfarwyddiadau i gynigwyr / y fanyleb / yr hysbyseb / hysbysiad y contract. Rhaid i chi sicrhau bod yr un wybodaeth am y cyfle contract ar gael i bawb sydd â diddordeb.
Rhaid ystyried y broses ddethol ar gyfer y tendr buddugol a ddaeth i law yn deg, a rhaid cofnodi’r rheswm neu resymau pam y dewiswyd cyflenwr penodol yn ysgrifenedig. Byddem yn disgwyl i chi ddewis y tendr rhataf gan y gallai eich dyfarniad fod yn seiliedig ar y rhataf o’r tri dyfynbris a roddwyd ar y cam cymeradwyo. Os na fyddwch, mewn amgylchiadau eithriadol, yn defnyddio’r tendr cystadleuol rhataf, rhaid i chi ddarparu esboniad ysgrifenedig yn nodi’r rhesymeg a’r rhesymau pam y dewiswyd y cyflenwr a ddewiswyd. Yn dibynnu ar y rhesymau dros wrthod y dyfynbris rhataf, efallai y bydd disgwyl i chi dalu’r gwahaniaeth rhwng y dyfynbris rhataf a’r dyfynbris a ddewiswyd.
Osgoi gwrthdaro buddiannau wrth gaffael
Rydym yn cydnabod ei bod yn bosibl y bydd ymgeiswyr, neu bobl sy’n gysylltiedig â nhw (megis perthnasau, partneriaid busnes neu ffrindiau), yn dymuno tendro am gontract sy’n cael ei gynnig gan yr ymgeisydd.
Mae hyn yn dderbyniol, ond bydd angen i ymgeiswyr sicrhau bod y broses dendro yn cael ei chynnal mewn modd agored, tryloyw a theg, fel yr amlinellir uchod. Ni ddylai’r broses roi unrhyw fantais i un unigolyn neu gwmni sy’n tendro dros unigolyn neu gwmni arall. Os oes gan ymgeisydd / datblygwr neu unrhyw unigolyn sy’n gysylltiedig â nhw fuddiant mewn unrhyw un o’r cynigion posibl am gontract a gynigir:
Mae’n rhaid i’r ymgeisydd / datblygwr, yr unigolyn neu’r parti sydd â buddiant roi gwybod am y buddiant hwnnw yn ysgrifenedig.
Ni ddylai’r unigolyn neu’r parti hwnnw sydd â buddiant gymryd unrhyw ran o gwbl yn unrhyw un o’r gweithdrefnau gwerthuso tendrau.
Rhaid i fanylebau a meini prawf gwerthuso beidio â bod yn rhagfarnllyd neu wedi’u teilwra i ffafrio un ateb neu unrhyw barti dros y llall.
Diben y canllawiau hyn yw sicrhau tegwch wrth wario arian cyhoeddus a sicrhau nad yw hygrededd yr ymgeisydd yn cael ei beryglu.
9. Y Gymraeg
Pan fo’r cyllid yn cynnwys neu’n ymwneud â darparu gwasanaethau neu ddeunyddiau ysgrifenedig (gan gynnwys arwyddion a gwybodaeth sy’n cael ei chyhoeddi ar-lein) yng Nghymru, mae’n rhaid eu darparu mewn modd nad yw’n trin y Gymraeg yn llai ffafriol na’r Saesneg, yn unol â Mesur y Gymraeg (Cymru) 2011.
10. Rheoli cymorthdaliadau
Bydd disgwyl i chi roi gwybod i ni gyda’ch ffurflen gais am unrhyw grantiau a chymorth arall yr ydych wedi’u cael gan y sector cyhoeddus dros y tair blwyddyn ariannol ddiwethaf.
Mae’r cynllun hwn yn dod o dan Ddeddf Rheoli Cymorthdaliadau 2022 gan Lywodraeth y DU, sydd mewn grym ar hyn o bryd. Ni ddylai cyfanswm yr isafswm cymorth ariannol a geir dros gyfnod treigl o dair blynedd ariannol fod yn fwy na £315,000 fesul busnes*. Os ydych wedi cael unrhyw gymorth ariannol arall yn ystod y tair blynedd ariannol ddiwethaf, disgrifiwch y gefnogaeth yn y blwch isod. Cyfrifoldeb yr ymgeisydd yw monitro lefel yr isafswm cymorth ariannol y mae’n ei gael. Os gwneir cynnig i chi, bydd angen i chi gadarnhau nad ydych wedi mynd dros y trothwy hwn. [*Sylwer bod trothwy’r isafswm cymorth ariannol yn berthnasol i’r grŵp cwmni cyfan.]
Rhaid i bob cynnig hefyd ystyried sut y bydd yn cyflawni yn unol â’r trefniadau rheoli cymhorthdal a nodir yng nghanllawiau Llywodraeth y DU (yn agor mewn tab newydd).
Lle nad yw ymgeiswyr yn dangos, yn ddigonol, bod y prosiect arfaethedig yn cydymffurfio â chyfundrefn rheoli cymorthdaliadau’r DU, efallai y caiff ei ystyried yn anghymwys, a gallai eich cais gael ei wrthod.
11. Ar ôl cwblhau – telerau ac amodau
Dylid nodi bod Cronfa Twf Busnes Sir Benfro yn grant dewisol ac yn amodol ar gymeradwyaeth gan Gyngor Sir Penfro.
Gellir adfer y grant pe bai’r busnes yn rhoi’r gorau i fasnachu, yn adleoli neu’n gwerthu’r eitemau a brynwyd fel rhan o’r grant o fewn pum mlynedd i’w ddyfarnu.
Rhaid i gwmnïau cyfyngedig ddefnyddio’r cyfrif banc busnes i brynu’r holl eitemau sy’n gysylltiedig â’r grant. Anogir unig fasnachwyr a phartneriaethau i ddefnyddio eu cyfrif banc busnes ar gyfer pob pryniant sy’n gysylltiedig â’r grant.
Mae’n bwysig nodi bod grantiau’n cael eu talu’n ôl-weithredol. Mae’n rhaid bod gan ymgeiswyr felly arian digonol i brynu’r eitem(au) yn llawn ymlaen llaw, ac yna hawlio gwerth y grant gan Gyngor Sir Penfro.
Os bydd y cais yn llwyddiannus, telir yr arian grant yn syth i gyfrif banc busnes yr ymgeisydd. Mae hyn yn seiliedig ar dderbynneb neu dystiolaeth o bryniant a threuliau, h.y. datganiadau banc printiedig gwreiddiol neu ar-lein ac anfonebau gwreiddiol i gadarnhau gwariant.
Rhaid i unrhyw newidiadau i gyflenwyr neu wariant sy’n wahanol i’r hyn a nodwyd yn y cais gael eu cymeradwyo gan y tîm grant cyn gwneud unrhyw bryniannau. Gall methu â cheisio cymeradwyaeth olygu na fydd y grant yn cael ei dalu am yr eitemau hynny.
Bydd angen tystiolaeth ffotograffig o’r holl eitemau sy’n gysylltiedig â’r grant i ategu’r hawliad. Mewn rhai achosion, bydd angen cynnal ymweliad safle.
Rhaid i’r ymgeisydd dderbyn telerau ac amodau’r grant trwy gwblhau’r hysbysiad o gymeradwyaeth a thelerau ac amodau o fewn 30 diwrnod o’i gael. Rhaid cwblhau’r holl wariant sy’n gysylltiedig â’r grant o fewn tri mis i ddyddiad y llythyr cymeradwyo, neu erbyn 31 Hydref 2025, pa un bynnag yw’r dyddiad cynharaf. Ni roddir estyniad amser ar gyfer cyflwyno’r hawliad.
Rhaid cyflawni / cynnal y swydd neu swyddi a grëwyd ac/neu a ddiogelwyd ac sy’n gysylltiedig â’r prosiectau o fewn chwe mis i daliad terfynol y grant, neu erbyn mis Mawrth 2025, pa un bynnag yw’r dyddiad cynharaf. Bydd y busnes a’r swyddi a grëwyd ac/neu a ddiogelwyd yn cael eu monitro, a bydd angen tystiolaeth. Gallai methu â chyflawni’r allbynnau yr ymrwymwyd iddynt arwain at orfod talu’r arian grant yn ôl.
I bob diben yn ymwneud â’r grant, bydd yr hawliad a thystiolaeth yn cael eu monitro gyda rhybudd ymlaen llaw ymhen un flwyddyn, tair blwyddyn a phum mlynedd o ddyddiad dyfarnu’r grant.
Os na fydd y prosiect yn mynd rhagddo o fewn y cyfnod a nodir yn y cynnig grant,
bydd y cynnig grant yn dod i ben yn awtomatig. Rhaid gofyn am unrhyw amrywiad i’r telerau ac amodau a nodir yn y llythyr cymeradwyo a chytuno arno.
Ni fydd pryniannau arian parod (neu ddefnyddio cardiau rhodd / arian parod) yn cael eu hystyried ar gyfer taliad grant.
Mae eitemau a brynwyd gyda chardiau credyd yn gymwys, ond bydd angen i ymgeiswyr ddangos tystiolaeth o’r trafodiad ar eu bil cerdyn credyd. **Mae’n rhaid i gwmnïau cyfyngedig ddefnyddio’r cardiau credyd busnes i brynu eitemau sy’n gysylltiedig â’r grant yn hytrach na chardiau personol y cyfarwyddwr neu’r cyfarwyddwyr.
Ni ellir cynnig na thalu grant os yw’r busnes neu’r ymgeisydd mewn ôl-ddyledion gydag unrhyw daliad i unrhyw un o’r awdurdodau lleol cyfranogol sy’n gweithredu’r cynllun.
12. Hawlio arian grant yn ôl
Bydd cyllid yn cael ei ddal yn ôl a/neu, i’r graddau y mae taliad wedi’i wneud, bydd derbynnydd y grant yn ad-dalu cyllid naill ai’n gyfan gwbl neu’n rhannol, gan gynnwys os:
- Bu gordaliad cyllid
- Yn ystod ei oes economaidd, mae’r prosiect yn mynd trwy newid sylweddol fel bod yr arian yn cael ei ddefnyddio at ddibenion heblaw’r rhai a nodir yn y cais, neu’n destun newid perchennog heb hysbysu Cyngor Sir Penfro.
Yr oes economaidd yw’r cyfnod hyd at bum mlynedd o ddyddiad taliad olaf y grant a bydd angen ad-dalu’r cyllid fel a ganlyn:
Dyddiad cael gwared ar ased ac ad-dalu’r cyllid
- O fewn un flwyddyn – ad-dalu’r cyllid yn llawn
- O fewn dwy flynedd – ad-dalu 80% o’r cyllid
- O fewn tair blynedd – ad-dalu 60% o’r cyllid
- O fewn pedair blynedd – ad-dalu 40% o’r cyllid
- O fewn pum mlynedd – ad-dalu 20% o’r cyllid
- Ar ôl pum mlynedd – dim cyllid i’w ad-dalu
Yr ad-daliadau gofynnol lleiaf yw’r hyn a nodir uchod.
Os na chaiff y swyddi eu creu a/neu eu diogelu, mae gan y cyngor sir yr hawl i hawlio’r grant yn ôl yn rhannol neu’n llawn.
Mae’n rhaid talu’r grant yn ôl yn llawn ar gais:
- Os canfyddir bod yr ymgeisydd wedi camliwio mewn cysylltiad â’r cais
- Os nad yw’r busnes yn masnachu rhagor
- Os bu newid sylweddol i’r manylion a ddarparwyd gennych yn eich cais
- Os gwerthir unrhyw eitem a brynwyd gyda’r arian grant
- Os bydd y busnes yn newid perchnogaeth
- Os bydd y cwmni yn gadael Sir Benfro neu’n cael ei werthu
13. Diogelu data a phreifatrwydd
Cyngor Sir Penfro yw’r rheolydd data ar gyfer yr wybodaeth bersonol rydych yn ei darparu ar y ffurflen hon. Defnyddir eich gwybodaeth wrth arfer ein hawdurdod swyddogol ac ni chaiff ei defnyddio at unrhyw ddiben arall. Noder y gallwn wirio’r data y byddwch yn eu rhoi yma yn erbyn setiau data eraill y cyngor a Llywodraeth y DU er mwyn dilysu’ch cais ac atal twyll. I gael rhagor o wybodaeth am sut mae Cyngor Sir Penfro yn trin eich data, gweler ein hysbysiad preifatrwydd corfforaethol.
Caiff yr wybodaeth bersonol yr ydym wedi’i chasglu gennych chi ei rhannu ag asiantaethau atal twyll, a fydd yn ei defnyddio i atal twyll a gwyngalchu arian ac er mwyn dilysu eich hunaniaeth. Os caiff twyll ei ganfod, gallai gwasanaethau penodol, cyllid neu gyflogaeth gael eu gwrthod i chi. Mae rhagor o fanylion am sut y byddwn ni, a’r asiantaethau atal twyll hyn, yn defnyddio’ch gwybodaeth, ynghyd â gwybodaeth am eich hawliau diogelu data, ar gael yma: CIFAS (yn agor mewn tab newydd).
14. Sut i wneud cais
Cyn i ni ofyn i chi wneud cais llawn, bydd angen i chi gyflwyno datganiad o ddiddordeb sy’n amlinellu eich cynnig busnes a’ch costau. Bydd angen yr wybodaeth ganlynol arnoch:
- Eich manylion
- Manylion y busnes a disgrifiad o’i brif weithgaredd
- Costau dangosol y prosiect
- Manylion unrhyw gyllid / arian ychwanegol
Noder na ddylech ddechrau ar eich prosiect cyn i’r cyllid gael ei ddyfarnu. Bydd unrhyw waith a ddechreuir / costau yr eir iddynt cyn dyfarnu’r cyllid yn cael eu hystyried yn anghymwys.