Penodeiaeth

Beth yw Penodai a beth y mae’n ei wneud?

Awdurdodir Penodai gan yr Adran Gwaith a Phensiynau (DWP) ar gais llwyddiannus i reoli budd-daliadau unigolyn ar ei ran.
Mae’n awdurdodi talu biliau a/neu wasgaru arian gan ddefnyddio budd-daliadau a geir gan Gyngor Sir Penfro (CSP) ar ran y defnyddiwr gwasanaeth.
Bydd yn hysbysu’r Adran Gwaith a Phensiynau am unrhyw newidiadau sy’n bwysig.
Bydd yn monitro adolygiadau, budd-daliadau a geir, arian sy’n cael ei wario a balans cronfa’r Penodeiaeth.

Math o Benodeiaeth

Mae Cyngor Sir Penfro yn cynnig dau fath o Benodeiaeth i ddefnyddiwr gwasanaeth cymwys:

Mae Penodeiaeth Cartref Gofal ar gyfer defnyddwyr gwasanaeth mewn lleoliad cartref gofal parhaol.
Mae Penodeiaeth Cymunedol ar gyfer defnyddwyr gwasanaeth sy’n byw yn y gymuned.

Cymhwysedd ar gyfer cael Penodai

Gall rhywun gael Penodeiaeth Corfforaethol os:

Ydyw’n ddefnyddiwr gwasanaeth o fewn gwasanaethau cymdeithasol neu wasanaethau iechyd Cyngor Sir Penfro gydag asesiad anghenion presennol, asesiad Deddf Galluedd Meddyliol a/neu gynllun gofal a chymorth a gweithiwr CSP penodedig.
Nad oes unrhyw unigolyn addas arall, fel perthynas neu ffrind agos a all reoli budd-daliadau’r unigolyn.
Nad oes ganddo fwy na £3,000 yn ei gyfrif(on) banc neu ddigon o arian i dalu cost y gwasanaeth ac mae’n rhaid iddo gael rhywun i helpu i reoli’r cyfrifon, oni bai bod cais am Ddirprwy hefyd yn cael ei wneud.
Nad oes ganddynt Benodai, Dirprwy neu unigolyn ag Atwrneiaeth eisoes, oni bai bod pryderon diogelu yn bresennol.
Lle bo’n briodol, ceir cytundeb wedi’i lofnodi i ildio Penodeiaeth sy’n bodoli eisoes.

Sut bydd budd-daliadau yn cael eu rheoli gan Benodai?

Bydd budd-daliadau a geir yn cael eu dyrannu i gyfriflyfr defnyddiwr gwasanaeth pwrpasol.
Bydd defnyddwyr gwasanaeth yn cael arian gwario a fydd naill ai’n cael ei dalu i’w darparwr, ei gredydu i gyfrif banc penodol neu gerdyn rhagdaledig.
Darperir taliadau arian parod dim ond pan nad oes dewis arall ar gael.
Bydd defnyddwyr gwasanaeth Penodeiaeth Cymunedol yn cael eu hasesu i weld a oes angen cerdyn rhagdalu arnynt. Bydd y Tîm Dirprwy Benodai yn credydu’r cerdyn yn unol â’r trefniadau y penderfynir arnynt gan y defnyddiwr gwasanaeth ar y cyd â gweithiwr cymorth a/neu weithiwr cymdeithasol.

Motability

Bydd y Penodai yn gyfrifol am unrhyw gerbyd a roddir drwy’r Cynllun Motability gan fod hyn yn gysylltiedig ag elfen symudedd budd-daliadau penodol. Fodd bynnag, bydd angen i’r Tîm Rheoli Gofal Oedolion benderfynu pa mor briodol yw mynediad parhaus i gerbyd Motability neu’r angen amdano fel penderfyniad budd pennaf a’i adolygu’n flynyddol.

Taliadau Gwasanaeth ar gyfer Penodeiaeth

Codir ffi weinyddol yn unol â Pholisi Codi Tâl cyfredol y Gwasanaethau Cymdeithasol.

Manylion cyswllt

Canolfan Gyswllt Cyngor Sir Penfro - 01437 764551

Tîm Dirprwyon a Phenodeiaeth - 01437 775618

Cymorth i Wneud Penderfyniadau