Fframwaith Rheoli Perfformiad

Cynllunio Corfforaethol

Sail rheoli perfformiad llwyddiannus yw dull cydlynol o gynllunio corfforaethol a dealltwriaeth glir o amcanion strategol y cyngor. Mae’n amhosibl monitro cynnydd heb ddiffinio yn gyntaf beth y mae’r cyngor yn ceisio ei gyflawni.

Yn fras, mae pedwar cam yn ein cylch rheoli perfformiad, sy’n cynnwys y canlynol:

• Nodi ein hamcanion llesiant (blaenoriaethau strategol), a nodir yn ein strategaeth gorfforaethol (o leiaf bob dwy flynedd).
• Cynllunio a chyflawni camau gweithredu – Cynlluniau cyfarwyddiaeth a gwasanaethau (blynyddol).
• Mesur ein perfformiad – Cardiau sgorio, e.e. cerdyn sgorio corfforaethol, cerdyn sgorio’r Gyfarwyddiaeth Gwasanaethau Cymdeithasol a Thai (misol / chwarterol).
• Adrodd ac adolygu ein cynnydd – Hunanasesiad blynyddol ac asesiad o berfformiad y panel yn allanol bob pum mlynedd.

 

Mae hyn yn dilyn y cylch parhaus o gynllunio, gwneud, monitro, adolygu, sy’n sail i ddull effeithiol o reoli perfformiad.

Wrth geisio sicrhau bod perchnogaeth eang o amcanion llesiant y cyngor, rydym yn cynnwys ystod eang o randdeiliaid ym mhob cam o’r broses hon, gan gynnwys wrth ddatblygu’r hyn y dylai ein hamcanion fod.  Caiff perfformiad ei fonitro mewn amrywiaeth o fforymau rheoli ac aelodau etholedig, e.e. yr Uwch-dîm Arwain, pwyllgorau trosolwg a chraffu a’r cabinet.

Dylai fframwaith rheoli perfformiad effeithiol alluogi unrhyw unigolion sy’n gweithio i sefydliad i nodi sut y mae eu gwaith yn cyfrannu at gyflawni amcanion cyffredinol y sefydliad.  Rydym yn cyflawni hyn drwy lunio a chyhoeddi hierarchaeth o gynlluniau wedi’u halinio sy’n cysylltu amcanion strategol, hyd at flaenoriaethau a chyflenwi gwasanaethau, ac â gweithgaredd unigol mewn ffordd gydlynol.  Cyfeirir at y ddolen hon yn aml fel ‘Y Llinyn Aur’:

• Cynllun Llesiant ar gyfer Sir Benfro – Cynllun ar gyfer Sir Benfro gyfan yw hwn, sy’n nodi sut y bydd sefydliadau allweddol yn y sector cyhoeddus, y sector preifat, a’r trydydd sector yn cydweithio i wella llesiant yn Sir Benfro dros y cyfnod rhwng 2023 a 2028. Fe’i cynhyrchir mewn partneriaeth ag amrywiaeth o sefydliadau eraill. Mae’n disgrifio’r materion sy’n bwysig i Sir Benfro, ac yn nodi’r dull y bydd amrywiaeth o sefydliadau yn ei fabwysiadu wrth geisio mynd i’r afael â nhw. Mae’r Cynllun Llesiant wedi’i gymeradwyo gan Fwrdd Gwasanaethau Cyhoeddus Sir Benfro, a’i gymeradwyo gan y cyngor (yn ogystal â byrddau sefydliadau eraill).  Mae’n cyd-fynd â’r saith nod llesiant cenedlaethol a nodir yn Neddf Llesiant Cenedlaethau’r Dyfodol 2015.  Mae’r Cynllun Llesiant yn cael ei adnewyddu bob pum mlynedd.
• Rhaglen ar gyfer y weinyddiaeth – Mae’r ddogfen hon yn nodi amcanion a dyheadau gwleidyddol y cabinet.
• Strategaeth gorfforaethol – Dyma gynllun cyffredinol y cyngor sy’n nodi’r cyfeiriad strategol dros gyfnod o bum mlynedd.  Mae’n nodi ein hamcanion llesiant statudol, yn sefydlu’r blaenoriaethau pennaf, a sut y bydd cynnydd yn cael ei fesur. Mae’r fersiwn ddiweddaraf ar gyfer 2025–2030, ac fe’i mabwysiadwyd gan y cyngor ar 6 Mawrth 2025.  Caiff y strategaeth ei hadolygu o leiaf bob dwy flynedd, gan ystyried y cyfeiriad gwleidyddol a osodwyd gan yr weinyddiaeth, ac i adlewyrchu unrhyw faterion, heriau a chyfleoedd sy’n dod i’r amlwg.
• Cynlluniau cyfarwyddiaeth a gwasanaeth – Bydd gwasanaethau naill ai’n cynhyrchu cynlluniau unigol neu, mewn rhai achosion, cynhyrchir cynllun cyfarwyddiaeth i annog a gwella gweithio integredig.  Mae’r cynlluniau hyn yn edrych dros orwel y tymor canolig (tair blynedd) ac yn cael eu hadolygu a’u hadnewyddu yn flynyddol.  Mae pob cynllun yn nodi’r camau gweithredu allweddol ar gyfer gwella ym mhob un o’n meysydd gwasanaeth. Mae’r camau gweithredu a nodwyd yn gysylltiedig â nodau llesiant cenedlaethol Cymru, yn ogystal â’r amcanion llesiant a ddisgrifir yn ein strategaeth gorfforaethol. Mae’r cynlluniau hefyd yn ei gwneud yn ofynnol i gyfarwyddwyr, penaethiaid gwasanaeth a rheolwyr ddarparu asesiad o berfformiad ar gyfer y flwyddyn flaenorol. Mae’r holl gynlluniau’n cael eu craffu a’u cymeradwyo gan yr Uwch-dîm Arwain, sy’n galluogi goruchwyliaeth strategol, yn ogystal â nodi cyfleoedd ar gyfer gweithio trawsadrannol mewn meysydd fel technoleg gwybodaeth neu adnoddau dynol.  Mae’r cynlluniau hyn hefyd wedi’u halinio â’r cynllun ariannol tymor canolig, ac yn cael eu defnyddio fel man cychwyn ar gyfer datblygu cyllideb y flwyddyn nesaf.
• Asesiadau unigol:Adborth, Ffocws a Dyfodol – O fis Mawrth 2025 ymlaen, mae’r cyngor wedi dechrau cyflwyno system datblygiad personol newydd, ‘Adborth, Ffocws a Dyfodol’.  Nod y broses hon yw rhoi cydnabyddiaeth i weithwyr am eu gwaith caled, a chyfle i siarad am sut y maen nhw’n dod ymlaen yn eu rôl o fewn amgylchedd diogel, gyda mwy o ffocws ar lesiant a datblygiad gweithwyr. Y broses newydd yw system o werthuso parhaus (yn hytrach na blynyddol), a bydd yn sicrhau bod trafodaethau pwysig yn cael eu cynnal mewn modd amserol, gan gynnwys y rhai ar gyfraniadau at amcanion y cyngor. Mae’r system newydd yn annog sgyrsiau ynghylch cydbwysedd rhwng bywyd a gwaith, rheoli llwyth gwaith, dysgu gweithwyr, gwella a datblygu sgiliau, a dyheadau ar gyfer y dyfodol.