Fframwaith Rheoli Perfformiad

Diwylliant

Mae llawer o’r tudalen hon yn canolbwyntio ar y systemau rydym wedi’u datblygu i’n helpu i reoli perfformiad. Mae hefyd yn bwysig archwilio’r diwylliant sy’n sail i hyn, sy’n allweddol i sbarduno gwelliant ar draws y sefydliad cyfan.

Fel sefydliad mae gennym ymdeimlad clir o bwrpas. Ein datganiad o weledigaeth yw: Gweithio gyda’n gilydd, gwella bywydau.

Mae gwaith tuag at ein gweledigaeth wedi’i ategu gan y datganiad cenhadaeth isod:

• Ymdeimlad o bwrpas: Ein diben ni yw ysbrydoli a chynorthwyo unigolion, cymunedau a sefydliadau i sicrhau gwelliannau mewn llesiant cymdeithasol, economaidd ac amgylcheddol.
• Gwelliant: Ein nod fydd trawsnewid y ffordd y mae’r sefydliad yn gweithio, gan arloesi a cheisio’r arferion gorau i’n helpu i gyflawni mewn ffyrdd mwy effeithiol ac effeithlon. Byddwn yn anelu at barhau i wneud dewisiadau doeth, drwy beidio â gwario mwy nag sydd gennym, ac osgoi prosesau a gwastraff diangen.
• Gweithio gyda’n gilydd: Byddwn yn cydweithio i helpu i ddarparu cymorth a gwasanaethau cydgysylltiedig i bobl Sir Benfro, ymwelwyr â’r sir, cymunedau a sefydliadau. Rydym wedi ymrwymo i barhau i ddatblygu partneriaethau effeithiol gyda chyrff yn y sector gwirfoddol, preifat a chyhoeddus o fewn a thu allan i’r sir.

 

Bydd y newid diwylliannol yr ydym am ei gyflawni yn llywio proses newydd o asesu personol a llesiant unigol sy’n gysylltiedig â’r fframwaith hwn, ac yn cael ei atgyfnerthu hefyd gan hynny. Lansiwyd y fenter newydd (Adborth, Ffocws a Dyfodol) yn ysgafn ym mis Mawrth 2025, gyda chynllun i’w chyflwyno’n llawn ar gyfer 2026 yn dilyn adolygiad o’i heffeithiolrwydd.

Rhaglen Weinyddiaeth – Mae’r ddogfen hon yn nodi dyheadau gwleidyddol y weinyddiaeth bresennol. Cytunwyd arni gan y cabinet ym mis Ionawr 2023, a chafodd ei hadolygu a’i diweddaru ym mis Hydref 2025.

Amcanion llesiant – Ym mis Mawrth 2025, cytunodd y cyngor ar bedwar amcan llesiant.  Mae’r amcanion hyn yn gosod y cyfeiriad strategol cyffredinol ar gyfer y cyngor, ac yn darparu’r fframwaith ar gyfer strategaeth gorfforaethol 2025–2030.  Yr amcanion llesiant yw:

• Ein Dyfodol – Galluogi’r dechrau gorau mewn bywyd i’n plant a’n pobl ifanc, wrth eu cyfarparu â sgiliau ar gyfer y dyfodol.
• Ein Lle – Lleoedd llewyrchus, gydag amgylcheddau glân, diogel a chynaliadwy, lle gall pobl fyw’n dda a ffynnu.
• Ein Cymunedau – Gofalu am bobl, a galluogi cymunedau gweithgar, dyfeisgar a chysylltiedig.
• Ein Cyngor – Cyngor sy’n gynaliadwy yn ariannol, sydd wedi’i lywodraethu’n dda, a chanddo weithlu sy’n gallu cefnogi’r bobl yr ydym yn eu gwasanaethu.

 

Trawsnewid – Mae dull y cyngor o drawsnewid yn ymateb i’r hinsawdd ariannol hynod heriol, a’r angen parhaus i gyflawni effeithlonrwydd sylweddol, arbedion cyllidebol a newid gwasanaethau ar draws y sefydliad. Mae’r rhaglen wedi cael ei hailbwrpasu yn ddiweddar, a chymeradwywyd trefniadau llywodraethu rhaglen newydd gan y cabinet ym mis Ebrill 2025. Bydd y Bwrdd Trawsnewid ac Arloesi sydd newydd ei sefydlu yn darparu goruchwyliaeth a chyfeiriad strategol i’r is-raglenni, gan ganolbwyntio ar y meysydd thematig canlynol:

• Ataliadau (0–25 oed).
• Digidol a deallusrwydd artiffisial.
• Ailgynllunio gwasanaeth Model Gweithredu Targed (TOM) / Vanguard.
• Datgarboneiddio ac addasu.