Gwybodaeth y Dreth Gyngor
Rhyddfreinwyr ar y Tir
Treth y Cyngor a Rhyddfreinwyr ar y Tir a Grwpiau Tebyg
Mae'r mudiad ‘Rhyddfreiniwr ar y Tir’ a grwpiau cyffelyb yn credu bod pobl yn rhwymedig i gyfreithiau statud y maent yn cydsynio iddynt yn unig.
Nid yw bod yn ‘ryddfreiniwr ar y tir’ yn eithrio unrhyw berson rhag talu’r Dreth Gyngor. Nid yw’r Dreth Gyngor yn ddewisol ac nid yw'n rhywbeth yr ydych yn cydsynio iddo. Os ydych yn atebol am dalu’r Dreth Gyngor, rhaid i chi wneud eich taliadau.
Mae'r rhwymedigaeth i dalu’r Dreth Gyngor yn dod o dan Ddeddf Cyllid Llywodraeth Leol 1992 a rheoliadau diweddarach. Dyma statud a grëwyd gan Senedd y Deyrnas Unedig a etholwyd yn ddemocrataidd, sydd wedi derbyn cydsyniad y Goron.
Am ragor o wybodaeth, ewch i: Deddf Cyllid Llywodraeth Leol 1992 (yn agor mewn tab newydd)
Mae'r atebolrwydd am dalu’r Dreth Gyngor yn cael ei osod gan Reoliadau’r Dreth Gyngor (Gweinyddu a Gorfodi) 1992. Mae hyn yn rhoi'r hawl i awdurdodau lleol alw am dalu’r Dreth Gyngor a ddefnyddir i ariannu gwasanaethau lleol hanfodol.
Am ragor o wybodaeth, ewch i: Rheoliadau’r Dreth Gyngor (Gweinyddu a Gorfodi) 1992 (yn agor mewn tab newydd)
Nid yw eich atebolrwydd am dalu’r dreth gyngor yn dibynnu ar gydsyniad, ac nid oes ei angen, neu fodolaeth perthynas gontractiol â'r cyngor. Mae unrhyw honiad o'r fath i'r gwrthwyneb yn anghywir ac nid oes unrhyw sail gyfreithiol i wneud y ddadl hon.
Mae dadleuon Rhyddfreinwyr ar y tir wedi cael eu hystyried gan y llysoedd a dyfarnwyd yn eu herbyn, a bydd camau adennill yn cael eu cymryd yn erbyn unrhyw un sy'n gwrthod talu. Pe bai angen i'r Cyngor gymryd camau adennill, bydd costau ychwanegol.
O bryd i'w gilydd byddwn yn cael pobl sy'n argyhoeddedig bod defnyddio cyfraith hynafol yn golygu nad oes rhaid iddynt dalu'r dreth gyngor ac mae llawer o erthyglau a thempledi camarweiniol ar y rhyngrwyd ynghylch cyfreithlondeb y dreth gyngor.
Os oes gennych unrhyw bryderon ynghylch codi’r dreth gyngor, ceisiwch gyngor annibynnol gan sefydliad fel Cyngor ar Bopeth neu gofynnwch am gyngor cyfreithiol, yn hytrach na dibynnu ar ffynonellau rhyngrwyd neu ddatganiadau fforwm a allai fod yn anghywir neu’n gamarweiniol.
Er ein bod yn gwneud ein gorau i ateb pob ymholiad perthnasol am y dreth gyngor, rydym yn cadw’r hawl i wrthod ymateb i ymholiadau annilys hirfaith sy’n canolbwyntio ar ddadleuon damcaniaethol nad oes iddynt unrhyw sail mewn statud sy’n defnyddio ein hadnoddau ar draul trethdalwyr eraill. Mae hyn yn cynnwys llythyrau a hysbysiadau a gyflwynir i brif weithredwr y cyngor gyda'r un rhesymu camarweiniol.