Tîm Cyfiawnder Ieuenctid

Mae Tîm Cyfiawnder Ieuenctid Sir Benfro yn cynnwys:

Rheolwr
Dau Uwch-ymarferydd
Rheolwyr Achosion
Swyddog Heddlu ar Secondiad
Swyddog Prawf ar Secondiad
Gweithwyr Camddefnyddio Sylweddau
Gweithwyr Ieuenctid Ataliol
Swyddog Cyswllt Dioddefwyr
Swyddog Gwneud Iawn
Dadansoddwr Perfformiad a Gwybodaeth
Rheolwr Busnes Ieuenctid Sir Benfro
Gweinyddwr y Tîm Cyfiawnder Ieuenctid

Mae'r Tîm Cyfiawnder Ieuenctid yn gweithio gyda phob unigolyn ifanc sy'n destun gorchmynion llys a datrysiadau y tu allan i'r llys. Bydd gofyn i'r unigolyn ifanc fynychu cyfarfodydd rheolaidd gyda'i reolwr achos a/neu weithiwr ieuenctid. Bydd y gwaith yn canolbwyntio ar ei ymddygiad troseddol a bydd gweithiwr y Tîm Cyfiawnder Ieuenctid yn ystyried pa gamau y gellir eu rhoi ar waith i leihau'r tebygolrwydd y bydd yr unigolyn ifanc yn aildroseddu. Gwneir atgyfeiriadau at asiantaethau eraill lle bo'n briodol.

Mae aelodau staff y Tîm Cyfiawnder Ieuenctid yn ymateb i anghenion troseddwyr ifanc mewn ffordd gynhwysfawr. Mae'r Tîm Cyfiawnder Ieuenctid yn asesu anghenion pob unigolyn ifanc, gan ddefnyddio offeryn asesu cenedlaethol. Mae hyn er mwyn nodi'r rhesymau penodol sy'n gwneud i'r unigolyn ifanc droseddu, ystyried cryfderau'r unigolyn ifanc a mesur lefel y pryderon diogelwch i'r unigolyn ifanc ac eraill.

Mae'r Tîm Cyfiawnder Ieuenctid yn darparu’r ymyrraeth a nodwyd yn sgil y broses asesu hon. Mae cryfderau/anghenion amrywiol unigolion ifanc yn cael eu nodi a'u datblygu. Bydd rheolwyr achos hefyd yn paratoi adroddiadau megis adroddiadau llys, adroddiadau i’r panel gorchymyn atgyfeirio ac adroddiadau i’r panel y tu allan i'r llys

Mae'r Tîm Cyfiawnder Ieuenctid hefyd yn darparu ymyrraeth i atal unigolion ifanc rhag troseddu o bosibl a rhag ymddygiad gwrthgymdeithasol. Cwblheir asesiad atal i lywio'r cynllun ymyrryd. Mae hyn yn dilyn atgyfeiriad atal gan weithwyr proffesiynol neu rieni pryderus. Ymgymerir â’r gwaith hwn fel cytundeb gwirfoddol rhwng yr unigolyn ifanc a'i riant/gofalwr.

Mae'r Tîm Cyfiawnder Ieuenctid yn eiriol dros gyfiawnder adferol a bydd yn ceisio dod â'r rhai sydd wedi'u niweidio gan drosedd neu wrthdaro a'r rhai sy'n gyfrifol am y niwed i gysylltiad, gan alluogi pawb yr effeithir arnynt gan ddigwyddiad penodol i chwarae rhan mewn atgyweirio'r niwed a chanfod ffordd gadarnhaol ymlaen. Mae hyn yn rhan o faes ehangach o'r enw arferion adferol a gall gynnwys ymagwedd ragweithiol at atal niwed a gwrthdaro a gweithgareddau sy'n atgyweirio niwed lle mae gwrthdaro eisoes wedi codi. Mewn rhai achosion, gellir cynnal cyfarfod adferol wedi'i hwyluso. Mae hyn yn galluogi unigolion a grwpiau i gydweithio i wella eu cyd-ddealltwriaeth o fater a dod o hyd i'r ateb gorau sydd ar gael ar y cyd. Ond mewn llawer o achosion gall dull llai ffurfiol, yn seiliedig ar egwyddorion adferol, fod yn fwy priodol.

Anfonwch neges e-bost i youthadmin@pembrokeshire.gov.uk am ragor o wybodaeth.