Canllawiau Gronfa Man Waith

Mae Cyngor Sir Penfro’n ymrwymedig i ddwyn gwelliannau go iawn yn Sir Benfro. Mae’r Gronfa Mân Waith Traffig a Phriffyrdd yn rhan o raglen Gwaith Priffyrdd y Cyngor.

Mae’r Gronfa Mân Waith Traffig a Phriffyrdd yn darparu cyfle i gynghorau Tref/Cymuned/Dinas gyflwyno cynigion ar gyfer cynlluniau sy’n fwy na’r rhai a gyflwynir i’r Gronfa Gwaith Cymunedol, sef cynlluniau priffyrdd cysylltiedig â thrafnidiaeth a fydd yn costio mwy na £10,000.

Caiff cynlluniau eu hasesu yn ôl pum elfen ac fe roddir sgôr ar y cyfan iddynt, gyda hyn wedyn yn bwydo i mewn i restr sy’n gosod yr holl gynlluniau yn nhrefn blaenoriaeth. Bydd cynlluniau nad ydynt yn cael sgôr uchel yn cael safle is ar y rhestr a bydd cynlluniau sy’n fwy na £150,000 yn cael eu dosbarthu’n “Gynlluniau a Enwir”. Bydd angen i’r rhain gael cyllid unigol o’r Gyllideb Rheoli Asedau Cyfalaf (CAMB) a bydd achos busnes yn cael ei gyflwyno i Gabinet y Cyngor Sir ar gyfer penderfyniad. Mae’r gronfa’n cael uchafswm o £170,000 y flwyddyn o Gyllideb Gyfalaf CSP ar gyfer yr holl gynlluniau, y bydd yr Awdurdod Lleol yn ceisio ei ddyrannu i gymaint â phosibl o gynlluniau buddiol.

Sylwer nad yw’r Gronfa Mân Waith yn amodol ar unrhyw gyllid cyfatebol gan y Cynghorau Lleol/Dinas/Cymuned a’i bod yn dibynnu ar brosesau penderfynu cyllidebol blynyddol.

1. Ar gyfer beth y mae cyllid ar gael?

Gellir defnyddio cyllid ar gyfer unrhyw welliannau o blith y canlynol:

• Troedffyrdd (newydd/estynedig/wedi’u gwella)
• Gwelliannau i weladwyedd wrth gyffyrdd
• Cilfachau Pasio
• Gwelliannau i safleoedd bysiau (newydd/wedi’u gwella).
• Mesurau gostegu traffig a rheoli traffig*
• Mân welliannau i ffyrdd cerbydau (h.y. lledu ffyrdd cerbydau).

2. Pa feini prawf y mae angen i’r cynllun eu bodloni?

Mae angen i brosiectau gyrraedd un o nodau corfforaethol Cyngor Sir Penfro hefyd, sydd wedi’u strwythuro ar sail pum amcan llesiant a nodir yng Nghynllun Corfforaethol y Cyngor Sir (2020 – 2021).

Mae’r amcanion fel a ganlyn;

• Codi safonau cyflawniad ar y cyfan
• Cymunedau iach: Cymunedau’n cael eu cefnogi gan dai fforddiadwy a phriodol; gwella gofal cymdeithasol
• Cynyddu cynhyrchiant yr economi a mynd i’r afael â materion adfywio
• Diogelu ein hamgylchedd
• Cymunedau hunangynhaliol a ffyniannus

Hefyd, dylai prosiectau ddangos y canlynol:

• Adlewyrchu blaenoriaethau a gweledigaeth y gymuned.
• Cefnogaeth gan y gymuned leol a sefydliadau partner trwy ymgynghori priodol.
• Maent yn dangos ôl meddwl da a gellir eu cyflawni
• Maent yn ystyried cynaliadwyedd yn y dyfodol
• Maent yn ychwanegu gwerth at weithgareddau presennol ac yn ategu prosiectau a mentrau eraill
• Trwy ymgynghori, maent yn cwrdd ag anghenion a chyfleoedd yn eu cymunedau yn awr ac yn y dyfodol
• Maent wedi ystyried sut y gall y prosiect fod o fudd i’r rhai sy’n rhannu nodweddion gwarchodedig¹

* Mae nodweddion gwarchodedig wedi’u dynodi dan Ddeddf Cydraddoldeb 2010 ac yn cynnwys pobl o wahanol alluoedd, oedrannau, cefndiroedd ethnig, rhyweddau a chrefyddau.

2. Faint o gyllid sydd ar gael a sut y caiff ei ddyrannu ledled y sir?

Ar y cyfan, tua £170,000 y flwyddyn yw gwerth y Gronfa Mân Waith Traffig a Phriffyrdd.

Caiff cynlluniau eu hasesu yn ôl eu rhinweddau unigol a’u costio yn ôl gofynion y cynllun. Bydd cynlluniau llai na £10,000 yn cael eu hasesu dan Gynllun y Gronfa Gwaith Cymunedol. Bydd unrhyw gynlluniau sy’n mynd y tu hwnt i’r gyllideb flynyddol o £170,000 yn cael eu nodi’n 'Gynlluniau a Enwir' a bydd angen iddynt gael eu cyflwyno ar gyfer eu ffrwd gyllidebol eu hunain trwy’r Gyllideb Rheoli Asedau Cyfalaf (CAMB).

Po fwyaf fo mewnbwn y Cyngor Tref/Cymuned/Dinas, po fwyaf ffafriol fydd y farn am y cynnig.

3. Beth yw’r Broses ar gyfer y Gronfa Mân Waith?

Caiff y broses ar gyfer y Gronfa Mân Waith ei nodi yn y diagram llif gwaith isod

Mae 4 cam allweddol i’r broses:

• Cychwyn Prosiect – Mae’r ffurflenni ar gael ar y wefan i Gynghorau Dinas/Tref/Cymuned eu lawrlwytho a’u cwblhau yn eu hamser eu hunain a chael cefnogaeth eu Haelod Lleol. Cyflwynir y ffurflen gais trwy’r e-bost wedyn i minorworksfund@pembrokeshire.gov.uk.
• Mae deialog gychwynnol gyda CSP ynghylch cynlluniau’n dechrau. Os yw’n ofynnol, gellir cynnal cyfarfod awr o hyd gyda swyddog priodol yn CSP i drafod y cynllun a gofynion pellach mewn manylder. Gofynnir i Gynghorau Dinas/Tref/Cymuned gasglu’r holl dystiolaeth sy’n ofynnol i ategu’r cynllun yn ystod y cyfnod hwn ac ymgynghori â’u hetholwyr.
• Asesu – Wedyn bydd Swyddogion CSP yn cynnal yr asesiad o’r cynllun ac yn cwblhau’r ffurflen asesu a fydd yn cynhyrchu sgôr ar y cyfan ar gyfer y prosiect. Sgôr y prosiect sydd wedyn yn penderfynu beth fydd safle’r cynllun ar y rhestr sydd yn nhrefn blaenoriaeth.
• Yn dilyn yr asesiad bydd tîm y Gronfa Mân Waith yn trafod hyfywedd y prosiect ac os nad yw cynllun yn bodloni’r meini prawf ni fyddir yn bwrw ymlaen ag ef yn y flwyddyn ariannol honno. Bydd Swyddogion CSP yn trafod y canlyniad ac yn gwneud unrhyw argymhellion ar gyfer cynllun amgen neu’n egluro pam nad yw’r cynllun gwreiddiol yn hyfyw.
• Datblygiau Dynluniad – Unwaith y mae cynllun wedi cael ei ystyried yn llwyddiannus o fewn y broses benderfynu, mae rhaglen fewnol o waith gan CSP yn dechrau gyda swyddogion i ddylunio, cyfrifo’r gost, gwneud unrhyw asesiadau rheoli traffig y mae eu hangen, cynnal asesiad yr Awdurdod Gweithredol Iechyd a Diogelwch a chrynhoi pecyn gwaith. Gellir gofyn am unrhyw wybodaeth bellach y mae ei hangen gan y Cyngor Dinas/Tref/Cymuned yn ystod y cyfnod hwn.
• Rhoi ar werth – Yn ystod y cam hwn, mae gwaith y cynllun yn dechrau ar y safle. Bydd rhaglen waith yn cael ei rhyddhau, bydd contractwyr perthnasol yn mynd ar y safle a bydd gwaith yn dechrau.
• Cwblhau’r Cynllun – Yn dilyn y gwaith ar y safle, bydd y gwaith wedyn yn cael ei arolygu gan CSP a’i gymeradwyo. Bydd unrhyw waith i ddatrys mân broblemau neu waith mireinio’n cael ei wneud cyn cwblhau’r broses gymeradwyo. Mae’r llinell amser ar gyfer rhoi’r cynllun ar waith a’i gwblhau’n ddibynnol ar gyllid a safle’r cynllun ar y rhestr flaenoriaethol ar y cyfan.
• Rhestr Wrth Gefn – Bydd unrhyw geisiadau aflwyddiannus nad ydynt yn cael cyllid o’r Gronfa Mân Waith ar gyfer y flwyddyn gyfredol yn cael eu gosod ar y Rhestr Wrth Gefn. Bydd hyn yn galluogi CSP i ymgysylltu â’r Cyngor perthnasol ar gyfer unrhyw addasiadau angenrheidiol i’r cynllun er mwyn iddo fod yn llwyddiannus yn y flwyddyn ganlynol. Efallai y bydd cynllun sydd ar y Rhestr Wrth Gefn yn dod yn “Gynllun a Enwir”, efallai y gellir ei integreiddio â Chynllun Mân Waith ehangach yn yr ardal neu y gallai gael ei gyflawni gan ddatblygwr. Lle y bo’n bosibl, bydd CSP yn gweithio gyda’r rhanddeiliaid allweddol i sicrhau bod prosiectau ar y Rhestr Wrth Gefn yn cael eu hadolygu a’u diweddaru’n rheolaidd i symud ymlaen.

5. Pwy all ymgeisio am gyllid?

Mae’r Gronfa Mân Waith ar agor i Gynghorau Dinas/Tref/Cymuned gyda chefnogaeth eu Haelodau Lleol. Fel arall gall Aelodau Etholedig godi cynlluniau’n uniongyrchol trwy’r un broses. Gofynnir i Aelodau Etholedig ddarparu cefnogaeth ysgrifenedig i Gynlluniau’r Gronfa Mân Waith os cânt eu codi gan Gynghorau Dinas/Tref/Cymuned.

6. Beth ellir ei gyllido?

Mae cyllid ar gael ar gyfer costau cyfalaf sy’n angenrheidiol ar gyfer cynlluniau priffyrdd a ganiateir, sef cysylltiadau troedffyrdd (newydd neu estynedig), gwelliannau i weladwyedd (h.y. mân welliannau i gyffyrdd), cilfachau pasio, gwelliannau i safleoedd bysiau, mesurau gostegu traffig a rheoli traffig, yn ogystal â mân welliannau i ffyrdd cerbydau.

Gall cyllid ar gyfer costau cyfalaf gynnwys:

• Gwaith ymchwilio, clirio a pharatoi ar y safle
• Costau adeiladau newydd a / neu adnewyddu gan gynnwys ffioedd proffesiynol uniongyrchol lle y bo angen
• Gwaith tirlunio a gwaith gwella amgylcheddol arall
• Gosodiadau a ffitiadau sy’n uniongyrchol gysylltiedig â’r prosiect

7. Beth na ellir ei gyllido?

Mae gweithgareddau eraill, na ellir eu cyllido, yn cynnwys:

• Y rhai sy’n gwrthdaro â nodau, amcanion neu bolisi Cyngor Sir Penfro neu unrhyw gwmni / sefydliad cysylltiedig arall neu’n effeithio’n anffafriol arnynt
• Y rhai y mae dyletswydd ar gorff cyhoeddus i’w darparu
• Y rhai sy’n cael neu a allai gael eu cyllido’n fwy priodol o ffynonellau eraill
• Y rhai sy’n dyblygu prosiectau eraill a gyflawnir yn lleol
• Y rhai sy’n effeithio ar gynaliadwyedd darpariaeth bresennol neu’n effeithio’n anffafriol ar y cynaliadwyedd hwnnw.
• Ni ellir ystyried y rhai sydd eisoes wedi cael eu cychwyn; fodd bynnag, gellir ystyried cam gwahanol o fewn yr un prosiect.
• Y rhai y mae contractau wedi cael eu llofnodi neu archebion wedi cael eu cyflwyno ar eu cyfer cyn eu cymeradwyo
• Costau gweithredu arferol neu gostau a ysgwyddir fel rhan o weithrediad beunyddiol / costau atgyweirio a chynnal a chadw rheolaidd / offer. Ar ôl unrhyw gyfnod o gyfrifoldeb am waith cynnal a chadw gan gyflenwr, y Cyngor Tref, Cymuned neu Ddinas fydd yn gyfrifol am gynnal a chadw.
• Gweithgareddau / costau cyflogaeth cyffredinol y sefydliad
• Rhwymedigaethau iechyd a diogelwch y sefydliad
• Costau TAW adenilladwy
• Yswiriant
• Y rhai sy’n hyrwyddo gweithgareddau ffydd grefyddol (er y gellir ystyried ceisiadau gan sefydliadau crefyddol os yw’r prosiect bwriadedig o fudd i’r gymuned ehangach)
• Y rhai sy’n gysylltiedig â phleidiau gwleidyddol
• Ymgyrchoedd codi arian
• Teithiau ac ymweliadau  

Arwyddion a Ysgogir gan Gerbydau (VAS)

Yn flaenorol, mae CSP wedi cefnogi cynlluniau i weithredu VAS mewn ardaloedd lle’r oedd mesurau gostegu traffig yn ofynnol o fewn y Gronfa Mân Waith. Fodd bynnag, o ystyried y Cynllun 20mya sydd ar fin cael ei roi ar waith gan Lywodraeth Cymru, mae penderfyniad wedi cael ei wneud i beidio â gweithredu cynlluniau VAS mwyach tan ar ôl i’r Cynllun 20mya gael ei roi ar waith, a bod cyfnod o fonitro wedi cael ei gwblhau. Bydd unrhyw VAS sydd eisoes ar waith yn cael ei ailgalibro’n awtomatig i’r terfyn cyflymder is a bydd monitro’n parhau i sicrhau ymddygiad da gan draffig.

8. Cyllid Cyfatebol

Nid oes unrhyw gyllid cyfatebol yn ofynnol gyda chynlluniau’r Gronfa Mân Waith.

9. Sut i Ymgeisio

Ceisiadau

Os oes gennych fanylion eich cynllun a chithau’n gwybod yn union beth yw’r mater y mae arnoch eisiau ei ddatrys, llenwch Ffurflen Gais y Gronfa Mân Waith. Mae ffurflenni ar gael o minorworksfund@pembrokeshire.gov.uk neu ar wefan CSP.

Dim ond un cais gan bob Cyngor Dinas/Tref/Cymuned y flwyddyn, y prosiect y gallwch ei wneud. Gall cyllid Mân Waith Traffig a Phriffyrdd gael ei ddefnyddio o bosibl i gyllido gwahanol gamau o brosiect, gyda chais pellach yn cael ei wneud unwaith y mae cam wedi cael ei gwblhau (gweler y Cwestiynau Cyffredin isod).

Cyflwyno Cais

Rhaid cyflwyno ceisiadau trwy’r e-bost i minorworksfund@pembrokeshire.gov.uk a dylent gynnwys llofnod pobl berthnasol yn y sefydliad wedi’i sganio.

Wedi i chi gyflwyno cais, bydd cydnabyddiaeth yn cael ei hanfon gan yr Isadran Seilwaith a Thîm y Gronfa Mân Waith. Bydd yr holl swyddogion yn gweithio gyda’r sefydliad sy’n ymgeisio i sicrhau bod yr holl wybodaeth angenrheidiol yn cael ei darparu.

Tystiolaeth Ategol ac Ymgynghori

Rhaid darparu tystiolaeth o ymgynghori ar y cynllun o fewn y Cyngor Dinas/Tref/Cymuned i ategu’r cais hwn. Gall hyn gynnwys rhestr o lofnodion cefnogol, tystiolaeth o hysbysebu manylion y cynllun yn unrhyw gylchlythyr Dinas/Tref/Cymuned neu Blwyf neu bapur newydd lleol a/neu dystiolaeth o gyhoeddi ar wefan briodol ar gyfer y Ddinas/y Dref/y Gymuned neu’r Plwyf. Cyfrifoldeb yr Ymgeisydd yw dangos yr ymgynghorwyd yn briodol cyn cyflwyno cais.

Gall fod yn ofynnol cyflwyno tystiolaeth arall ar ffurf cyswllt â rhanddeiliaid ym maes Treftadaeth, Adeiladau Rhestredig, Tirfeddianwyr/Landlordiaid, Cyfleustodau Statudol a’r Amgylchedd. Ceir rhestr fwy cyflawn yn Adran 10, isod.

Cefnogaeth Cynghorwyr

Mae angen dangos cefnogaeth gan yr Aelod Etholedig perthnasol ar ffurf tystiolaeth ysgrifenedig ac mae’n rhaid ei chyflwyno gyda’r cais.