Parcio yn Sir Benfro

Mannau Parcio i Bobl Anabl

Cynllun peilot parcio i bobl anabl - diweddariad 

Cynhaliodd Cyngor Sir Penfro gynllun peilot yn 2023-2024 a 2024-2025, i ddarparu lleoedd parcio pwrpasol i drigolion anabl cymwys ledled Sir Benfro.

Yng nghyfarfod y Pwyllgor Trosolwg a Chraffu ar Wasanaethau ar 25 Tachwedd 2025, adolygodd yr aelodau sut mae'r cynllun peilot wedi gweithio dros y ddwy flynedd ddiwethaf. Yn ystod y cyfnod hwn, cawsom 181 o geisiadau a gosod 20 o gilfannau parcio. 

Mae'r cynllun peilot wedi rhoi cipolwg defnyddiol inni, ond tynnodd yr adolygiad sylw hefyd at rai gofynion cyfreithiol pwysig o dan Ddeddf Rheoleiddio Traffig Ffyrdd 1984. Mae'r gyfraith hon yn nodi bod rhaid i gyfyngiadau parcio fod yn berthnasol i grwpiau o ddefnyddwyr (fel deiliaid bathodyn glas) yn hytrach na phobl unigol.

Er mwyn sicrhau ein bod yn dilyn y gyfraith ac yn cadw pethau'n deg, cytunodd y pwyllgor i roi’r gorau i fannau parcio a ddyrannir yn unigol ac yn lle hynny darparu mannau parcio y gall unrhyw ddeiliad bathodyn glas cymwys eu defnyddio. Bydd y newid hwn yn:

• Dileu'r angen am asesiadau unigol

• Sicrhau ein bod yn cydymffurfio â deddfwriaeth genedlaethol

• Gwneud cilfannau parcio ar gael i bob defnyddiwr cymwys

Yn y dyfodol, bydd ceisiadau am gilfannau parcio bathodyn glas newydd yn cael eu hystyried fesul achos ochr yn ochr â chyfyngiadau parcio eraill.