Polisi Cymorth Ariannol Tai Sir Benfro

Cofrestr tai hygyrch Sir Benfro (rhan o bolisi dyrannu Cartrefi Dewisedig)

Ar hyn o bryd, mae gan Sir Benfro gofrestr tai hygyrch sy’n rhestru’r ymgeiswyr hynny sydd angen tai arbenigol wedi’u haddasu neu dai y gellir eu haddasu. Mae tai sydd ar gael drwy gofrestr tai hygyrch Sir Benfro yn cynnwys eiddo wedi’u haddasu ar gyfer pobl anabl.

I fod yn gymwys ar gyfer cofrestr tai hygyrch Sir Benfro, bydd angen i ymgeiswyr gael asesiad ac atgyfeiriad gan therapydd galwedigaethol neu weithiwr meddygol proffesiynol cymwys arall fel meddyg teulu.

 

Er mwyn sicrhau bod ymgeiswyr yn ymgeisio ar gyfer eiddo priodol, bydd y bobl hynny ar gofrestr tai hygyrch Sir Benfro yn cael eu categoreiddio yn ôl y meini prawf canlynol:

Lefel 1

• Defnyddiwr cadair olwyn dan do neu’r rhai â chyflwr dirywiol sy’n golygu y bydd eu sefyllfa debygol yn golygu bod angen cadair olwyn arnynt i’w defnyddio dan do.

Lefel 2

• Defnyddiwr cadair olwyn awyr agored y mae angen llety ar y llawr gwaelod arno ond sy’n gallu cerdded dan do gan ddefnyddio cymhorthion cerdded os oes angen.

neu

• Rhai problemau symudedd ond gellid eu diwallu gydag addasiadau fel lifft grisiau a chawod mynediad gwastad.

Nid yw’r rhestr uchod yn gynhwysfawr, ac mae pob cais yn cael ei asesu ar ei rinweddau unigol.

Ni fydd ymgeiswyr ar Lefel 1 cofrestr tai hygyrch Sir Benfro yn cael eu rhoi ar y rhestr fer ar gyfer cartrefi anghenion cyffredinol. Bydd y rhai ar Lefel 2 yn cael eu hystyried ar gyfer eiddo anghenion cyffredinol sy’n addas i’w haddasu.

 

Addasiadau eiddo’r cyngor – angenrheidiol a phriodol

Wrth ystyried cais am addasiadau i eiddo’r cyngor, mae angen ystyried mynediad i’r eiddo. Byddwn yn gweithio tuag at ddosbarthu ein stoc dai sy’n eiddo i’r cyngor yn y categorïau canlynol:

Categori 1

Eiddo sy’n hygyrch i gadeiriau olwyn sy’n addas ar gyfer defnyddwyr cadeiriau olwyn dan do, gan gynnwys cartrefi am oes (nid yw hyn yn cynnwys fflatiau ar y llawr cyntaf neu uwchben).

Categori 2

Eiddo sydd wedi cael rhai addasiadau sy’n addas ar gyfer unigolyn anabl sydd â rhywfaint o allu i gerdded ond nad yw’n ddefnyddiwr cadair olwyn dan do, e.e. cawod mynediad gwastad, rheiliau gafael, rampiau bach.

Categori 3

Eiddo nad oes ganddynt unrhyw addasiadau ar adeg yr arolwg ond sy’n addas i’w haddasu yn y dyfodol i ddiwallu anghenion unigolyn anabl sydd â rhywfaint o allu i gerdded ond nad yw’n ddefnyddiwr cadair olwyn dan do.

Categori 4

Eiddo nad ydynt yn addas i’w haddasu oherwydd lefel yr addasiadau y byddai eu hangen i ddiwallu anghenion unigolyn anabl. Felly, ystyrir nad yw addasiadau (mynediad mewnol neu allanol) yn rhesymol nac yn ymarferol. (Gall eithriadau fod yn berthnasol os oes addasiadau bach fel rheiliau gafael a rampiau bach eisoes yn eu lle neu os ydynt wedi’u gosod i ddiwallu anghenion preswylydd presennol.)

 

Os yw’r eiddo wedi’i ddosbarthu fel un nad yw’n addas ar gyfer pobl â phroblemau symudedd, yna ystyrir nad yw’n rhesymol nac yn ymarferol gwneud yr addasiadau o fewn yr eiddo hwn. Mewn amgylchiadau o’r fath, bydd angen i’r Gwasanaeth Tai ar y cyd â’r therapydd galwedigaethol ystyried anghenion hirdymor y tenant anabl fel unigolyn/aelwyd ynghyd â’r addasiadau gofynnol. Bydd angen i opsiynau tai amgen fod yn ystyriaeth sylfaenol mewn achosion o’r fath, a gweithio gyda thimau rheoli dyraniadau a thenantiaethau i ddod o hyd i lety addas arall.

Wrth wneud y penderfyniad a ddylid darparu addasiadau yn yr eiddo, mae angen ystyried y canlynol. 

Yr hyn sy’n bwysig i’r tenant 

• Categori: Nodau/amcanion
• I'w ystyried: A yw’r gwaith yn gallu cefnogi rolau ac arferion yr unigolyn anabl, gan gynnwys gofalu am eraill neu gefnogi gofalwyr sy’n gofalu am yr unigolyn anabl? 

Anghenion a nodwyd 

• Categori: Hirdymor a chynaliadwy 
• I'w ystyried: A yw’r gwaith yn darparu ateb hirdymor i ddiwallu’r angen/anghenion a defnydd yn y dyfodol? 

Cyraeddadwy yn yr amgylchedd 

• Categori: Economaidd
• I'w ystyriad: A yw’n bosibl cyflawni’r addasiad o fewn yr eiddo? 
• I'w ystyriad: A yw’r gwaith yn darparu gwerth am arian wrth leihau costau gofal?

Os na yw’r ateb i unrhyw un o’r uchod, dylid ystyried dewisiadau amgen addas, a all gynnwys tai amgen. Yn yr amgylchiad hwn, bydd y Gwasanaeth Tai yn gweithio gyda’r tenantiaid i ddod o hyd i dai addasadwy neu addasedig eraill o’n stoc tai cyngor.