Herio bwlio

Gall wynebu bwlio, boed yn yr ysgol, ar-lein, neu yn y gymuned, gael effaith ddifrifol ar lesiant, hyder a gallu plentyn i fynychu’r ysgol. Mae’r Gwasanaeth Lles Addysg yma i gynorthwyo plant, pobl ifanc a theuluoedd yr effeithir arnynt gan fwlio.

Gan weithio mewn partneriaeth ag ysgolion, teuluoedd ac asiantaethau eraill, gall ein Swyddogion Lles Addysg helpu i fynd i’r afael â phryderon presenoldeb sy’n gysylltiedig â bwlio, eirioli dros anghenion plentyn, a sicrhau bod cymorth priodol ar waith. Rydym yn gwrando heb farnu ac yn gweithio i sicrhau bod pob plentyn yn teimlo’n ddiogel, yn cael ei glywed, ac yn gallu cael mynediad at ei addysg heb fod ag ofn.

Os yw bwlio yn effeithio ar bresenoldeb neu lesiant eich plentyn chi, cysylltwch â ni; rydym yma i’ch helpu chi i ddod o hyd i ffordd o symud ymlaen.

Deall ac ymateb i fwlio

Fel rhiant neu ofalwr, rydych chi’n chwarae rhan hanfodol wrth helpu’ch plentyn i lywio cyfeillgarwch a rhyngweithiadau cymdeithasol, wyneb yn wyneb ac ar-lein. Drwy ei arwain i drin eraill â charedigrwydd a pharch, a thrwy hyrwyddo sgyrsiau agored am ei brofiadau, gallwch gefnogi ei lesiant cymdeithasol ac emosiynol.

Yn aml, chi yw’r cyntaf i sylwi a ydyw eich plentyn yn ymddangos yn encilgar, yn anhapus, yn orbryderus, neu’n fwy ymosodol nag arfer. Gall y rhain fod yn arwyddion bod rhywbeth ddim yn iawn, ac o bosibl ei fod yn wynebu neu’n rhan o fwlio.

Rydym yn deall y gall darganfod bod eich plentyn yn rhan o fwlio, boed fel dioddefwr neu droseddwr, ddod â chymysgedd o emosiynau: pryder, tristwch, dicter, neu euogrwydd. Cofiwch, nid ydych chi ar eich pen eich hun, ac y mae ffordd ymlaen. Rydyn ni yma i helpu.

Beth yw bwlio?

Mae Cyngor Sir Penfro yn diffinio bwlio fel a ganlyn:

"Ymddygiad gan unigolyn neu grŵp, a ailadroddir dros amser, sy’n fwriadol niweidiol i eraill naill ai’n gorfforol neu’n emosiynol."

Gall bwlio ddigwydd wyneb yn wyneb neu ar-lein (seiberfwlio), ac fel arfer mae’n cynnwys tair elfen allweddol:

Niwed bwriadol – mae’r ymddygiad yn fwriadol.
Wedi’i ailadrodd dros amser – nid yw’n ddigwyddiad untro.
Anghydbwysedd pŵer – mae’r unigolyn sy’n cael ei dargedu yn teimlo’n analluog wrth amddiffyn ei hun.

Er nad yw pob gwrthdaro neu ymddygiad annerbyniol yn fwlio, mae bob amser yn bwysig cymryd pryderon eich plentyn o ddifrif a cheisio cymorth os oes angen.

Sut y gall y Gwasanaeth Lles Addysg helpu

Os yw bwlio yn effeithio ar bresenoldeb, llesiant neu ymddygiad eich plentyn, gall ein swyddogion lles addysg weithio gyda chi ac ysgol eich plentyn i helpu i fynd i’r afael â’r mater. Rydym yn cefnogi teuluoedd drwy ymyrraeth gynnar, cyngor, eiriolaeth, ac atgyfeiriadau at gymorth pellach os oes angen.

Ni ddylai unrhyw blentyn deimlo’n anniogel neu heb gefnogaeth yn yr ysgol. Os ydych chi’n pryderu, cysylltwch â ni, rydyn ni yma i helpu.

Pryd nad yw’n fwlio?

Mae’r canlynol yn enghreifftiau o ymddygiad annerbyniol ond nid ydynt yn enghreifftiau o fwlio:

anghytundeb neu ffrae
dadl neu ffrae untro
problemau perthynas lle mae angen i blant neu bobl ifanc ddysgu sut i gyd-dynnu’n well
rhywun yn bod yn gas gyda geiriau neu weithredoedd angharedig neu amharchus.

Rhaid herio pob ymddygiad annerbyniol, boed yn fwlio ai peidio.

Beth allwch chi ei wneud i helpu?

Mae yna lawer o bethau y gallwch chi eu gwneud fel rhiant / gofalwr i gynorthwyo’ch plentyn. Mae’r canllawiau isod yn rhoi rhai syniadau ynglŷn â sut i siarad â’ch plentyn am fwlio, sut i adnabod yr arwyddion, sut y gallwch chi ei helpu, a sut i feithrin hyder a hunan-barch eich plentyn. Mae’r canllawiau hefyd yn rhoi gwybodaeth am ddelio â bwlio ar-lein. Mae’n ymdrin ag ymdopi ag effeithiau bwlio a rheoli eich teimladau a’ch gweithredoedd eich hun.

Canllawiau i rieni a gofalwyr (yn agor mewn tab newydd)

Canllawiau i bobl ifanc (yn agor mewn tab newydd)

Canllawiau i blant (yn agor mewn tab newydd)

Beth i’w ddisgwyl gan ysgol eich plentyn

Mae gan bob ysgol ddyletswydd gofal i ddarparu amgylchedd diogel a chefnogol i ddysgwyr. Yn ôl y gyfraith, rhaid iddyn nhw gael polisi ymddygiad, ac rydym yn disgwyl iddyn nhw gael polisi gwrth-fwlio clir hefyd. Mae’r polisïau hyn yn amlinellu sut mae pryderon ynghylch bwlio yn cael eu trin, a dylent fod ar gael ar wefan yr ysgol neu ar gais.

Codi pryder ynglŷn â bwlio: camau cyffredinol

Os oes angen i chi roi gwybod am ddigwyddiad bwlio, dilynwch y camau hyn, gan roi amser i’r ysgol weithredu a monitro’r cynnydd:

Siaradwch â’r athro / athrawes dosbarth, y tiwtor dosbarth, neu’r pennaeth blwyddyn
Os na chaiff ei ddatrys, anfonwch e-bost at y pennaeth
Nesaf, cysylltwch â chorff llywodraethu yr ysgol
Os oes angen, codwch y mater gyda’r awdurdod lleol

Drwy gydol y broses, cadwch gofnod ysgrifenedig o’ch cyfathrebiadau, gan gynnwys y canlynol:

Gyda phwy y siaradoch chi
Pryd a sut y gwnaed cysylltiad
Beth a drafodwyd
Unrhyw gamau gweithredu a chyfrifoldebau y cytunwyd arnynt

Cofiwch: mae cyfathrebu amserol a chyson yn helpu ysgolion i gymryd camau effeithiol i gadw’ch plentyn yn ddiogel ac i’w gefnogi.

Cyfleu pryderon yn barchus

Rydym yn deall y gall materion sy’n ymwneud â’ch plentyn beri gofid, ond mae’n bwysig ymdrin â phryderon drwy’r sianeli priodol.

Osgowch ddefnyddio’r cyfryngau cymdeithasol i leisio cwynion am yr ysgol neu i feirniadu neu fygwth aelodau unigol o staff. Gall hyn waethygu’r sefyllfa, achosi niwed diangen, a gall arwain at ganlyniadau cyfreithiol. Mae gan ysgolion ddyletswydd gofal nid yn unig i ddisgyblion ond hefyd i’w staff.

Yn yr un modd, peidiwch â mynd at blant neu deuluoedd eraill sy’n gysylltiedig naill ai wyneb yn wyneb neu ar-lein. Gall wynebu eraill gynyddu tensiynau a gwneud y sefyllfa’n anoddach i’w datrys.

Er mwyn sicrhau’r canlyniad gorau i’ch plentyn, rydym yn eich annog i weithio gyda’r ysgol drwy’r gweithdrefnau priodol a chyfathrebu’n agored a pharchus bob amser.

Presenoldeb Ysgolion a Lles Disgyblion