Tai Preifat

• Mae benthyciadau ar gael i berchen-feddianwyr, landlordiaid, tenantiaid (gydag ymrwymiad atgyweirio), datblygwyr ac elusennau / trydydd sector.
• Rhaid i'r ceisydd allu fforddio ad-daliadau'r benthyciad a chael prawf er mwyn sicrhau y bydd yn gallu ad-dalu'r benthyciad.
• Rhaid i waith a wneir gyda benthyciad gyfrannu at wneud yr eiddo'n gynnes neu ddiogel.
• Mae benthyciadau ar gael o £1000 i £25,000 fesul "uned drigiannol" (tŷ / fflat) hyd at uchafswm o £150,000 y ceisydd (6 uned neu fwy).
• Ni all unrhyw fenthyciad sy'n cael ei gynnig, gan ystyried morgais / benthyciad presennol fod yn fwy nag 80% o werth cyfredol yr eiddo.
• Y cyfnod ad-dalu hwyaf fydd deng mlynedd i berchen-feddiannwr a phum mlynedd i landlord sector preifat.
• Noder bod cyfnodau ad-dalu yn lleihau’n flynyddol gan fod y cyllid wedi’i fenthyg i’r awdurdod lleol gan Lywodraeth Cymru a bod y cyllid i’w ad-dalu yn 2030.
• Bydd ad-daliadau'n cael eu gwneud yn fisol trwy Ddebyd Uniongyrchol; yr ad-daliadau lleiaf yw: 
  
  • Perchen-feddianwyr - £50 y mis
  • Landlordiaid - £100 y mis

Bydd un ffi weinyddol yn berthnasol y mae modd ei thalu dros gyfnod y benthyciad neu o flaen llaw; y ceisydd fydd yn penderfynu hyn.

• Am fenthyciadau dros hyd at 3 blynedd, y tâl fydd 10%
• Am fenthyciadau dros 4 i 10 mlynedd, y tâl fydd 15%

Mae nifer o amodau ar holl fenthyciadau cymeradwy er mwyn sicrhau bod arian y gronfa fenthyca'n cael ei 'ailgylchu' i gynorthwyo gyda darparu rhagor o Fenthyciadau Gwella Cartrefi.  

Os oes gennych ddiddordeb mewn gwneud cais, llenwch a dychwelwch ffurflen mynegi diddordeb.

Benthyciad Gwella Cartref Canllawiau

Cyflwyniad

Oherwydd gostyngiad yng nghyllid Llywodraeth Cymru yn y blynyddoedd diwethaf, mae’r cymorth ariannol sydd ar gael ar gyfer grantiau tai gryn dipyn yn llai ac wedi dod i ben dan y rhan fwyaf o amgylchiadau. Felly er mwyn gwneud y gorau o’r cyllid sydd ar gael a helpu dal i wella tai yn Sir Benfro, mae angen defnydd mwy cynaliadwy ac effeithiol o adnoddau prin.

Bydd Benthyciadau Gwella Cartrefi’n galluogi ailgylchu cyllid a chynorthwyo gwella safonau tai ar hyd a lled y Sir. 

Beth yw Benthyciadau Gwella Cartrefi?

Benthyciadau Gwella Cartrefi yw benthyciadau sydd ar gael trwy Awdurdodau Lleol yng Nghymru i alluogi adnewyddu a gwella eiddo unigol neu luosog er mwyn gwella neu gynnal y safonau o fewn yr eiddo sy’n sicrhau parhad ei ddefnydd fel llety preswyl.

Rhaid i waith a wneir gyda chyllid benthyciad gyfrannu at wneud yr eiddo’n gynnes a diogel. Nid oes unrhyw ofyniad bod yr eiddo’n gorfod cyrraedd pob un o’r meini prawf hyn oherwydd y byddai modd targedu’r benthyciad ar un elfen allweddol.

Pwy all wneud cais am fenthyciad? 

Fe all perchenogion tai islaw’r safon yn y Sir wneud cais am y benthyciad. Nid yw anheddau gwag yn gymwys, oni bai fod y perchenogion yn bwriadu byw yn yr eiddo fel eu prif gartref. Mae hyn yn cynnwys:

• Perchen-feddianwyr
• Landlordiaid
• Datblygwyr
• Elusennau / Trydydd Sector

Caiff perchenogion a landlordiaid flaenoriaeth. Rhaid rhoi blaenoriaeth i landlordiaid sy’n cynnig tai fforddiadwy / tai cymdeithasol / hawliau enwebu dros landlordiaid sy’n cynnig eiddo ar rent y farchnad.

Os yw eiddo dan gydberchenogaeth bydd y ddwy ochr yn gorfod cytuno i osod pridiant cyfreithiol ar yr eiddo, gan gynnwys llofnodi dogfennau cytundeb y pridiant cyfreithiol a chyfleuster benthyciad; fodd bynnag dim ond un ohonynt fydd yn gorfod llenwi’r ffurflen gais.

A yw’r eiddo’n gorfod bod yn gartref presennol i fod â hawl i fenthyciad?

Nac ydi.

Byddwn yn ystyried ceisiadau am fenthyciadau i droi eiddo masnachol gwag yn llety preswyl. Fodd bynnag, dim ond perchenogion sy’n bwriadu byw yn yr eiddo’n llawn-amser fydd â hawl i wneud cais am Fenthyciad Gwella Cartref dan yr amgylchiadau hyn.

Bydd angen i landlordiaid sy’n bwriadu gosod yr eiddo ar rent gyfeirio at ein Benthyciad Eiddo Gwag Troi Tai’n Gartrefi. 

Mae’n debygol iawn y bydd arnoch angen caniatâd cynllunio ar gyfer yr addasu ac, felly, cewch eich annog yn gryf i gysylltu â’r adran gynllunio leol i drafod eich cynigion. Ni fyddwn yn ystyried cais am fenthyciad os na roddwyd y caniatâd cynllunio perthnasol.

Beth yw’r benthyciad mwyaf i gallaf wneud cais amdano?

Mae modd gwneud ceisiadau am fenthyciad rhwng £1000 a £25,000 fesul uned drigiannol, hyd at uchafswm o £150,000 ar unrhyw adeg arbennig. Os ydych yn gwneud cais am fenthyciad ar gyfer adeilad gyda dwy uned (fflatiau), y benthyciad mwyaf y gallwch wneud cais amdano yw £50,000. Os ydych yn gwneud cais am fenthyciad ar gyfer eiddo gyda chwe uned neu fwy (fflatiau), y benthyciad mwyaf fyddai £150,000.

Bydd union faint y benthyciad a gaiff ei gymeradwyo’n dibynnu ar wir gost y gwaith, e.e. os mai amcangyfrif cost y gwaith yw £10,000, dyma’r benthyciad mwyaf fydd yn cael ei gymeradwyo.

Sylwch na all unrhyw fenthyciad sy’n cael ei gynnig, gan ystyried unrhyw forgais presennol, fod yn fwy nag 80% o werth presennol yr eiddo. Felly, os oes gennych forgais presennol o £76,000 ar eiddo gyda gwerth cyfredol ar y farchnad o £120,000, yna’r benthyciad mwyaf y mae modd ei gymeradwyo yw £20,000:

• Gwerth presennol: £120,000
• Morgais a benthyciad: £76,000 + £20,000 = £96,000 (Uchafswm 80% Benthyciad i werth)

Os oes morgais presennol bydd gwerth cyfredol yr eiddo’n cael ei benderfynu a’i gefnogi trwy adroddiad prisio. Rhaid i syrfëwr cymwysedig neu aelod o Sefydliad Brenhinol y Syrfewyr Siartredig (RICS) wneud y prisio a dylai gadarnhau’r gwerth cyfredol ar y farchnad, gwerth dichonol (wrth gwblhau’r prosiect) ac incwm rhent (os yw’n fenthyciad i osod).

Mae cost y prisio’n daladwy gan y ceisydd.

A fydd fy sefyllfa ariannol yn cael ei hystyried?

Bydd.

Bydd prawf fforddiadwyedd ar y ceisydd er mwyn sicrhau bod modd ad-dalu’r benthyciad. Bydd y prawf fforddiadwyedd yn ffurfio rhan o’r broses ymgeisio ac yn cael ei gynnal gan drydydd parti (Undeb Credyd Gorllewin Cymru Cyf). Caiff ad-daliadau lleiaf eu pennu ar £50 y mis ar gyfer berchennog / deiliaid a £100 y mis ar gyfer landlordiaid.

Mae hyd (cyfnod ad-dalu) y benthyciad yn destun cytundeb rhwng pawb ac, felly, byddwn yn ceisio gweithio gyda chi ar bennu amserlen ad-dalu addas cyn cytuno i’r benthyciad. 

Noder bod cyfnodau ad-dalu yn lleihau’n flynyddol gan fod y cyllid wedi’i fenthyg i’r awdurdod lleol gan Lywodraeth Cymru a bod y cyllid i’w ad-dalu yn 2030.

• Hanes credyd gwrthwynebus sy’n gallu cynnwys:
• Dyfarniadau Llys Sirol (CCJ)
• Trefniadau Gwirfoddol Unigol (IVA)
• Gorchymyn Rhyddhau Dyled (DRO)
• Methdaliad (yn ystod y 6 blynedd diwethaf)
• Ansolfedd / Diddymiad Cwmni
•  Unrhyw ddyled heb ei thalu i Gyngor Sir Penfro ar adeg gwneud y cais

Beth sydd raid i mi wneud gyda’r eiddo neu unedau ar ôl cwblhau’r gwaith?

Ar ôl cwblhau’r gwaith rhaid dal i ddefnyddio’r eiddo fel cartref, boed hynny drwy berchen-feddiannu neu ar rent i denantiaid. Nid oes unrhyw gyfyngiadau ar y math o denantiaeth (e.e. rhent fforddiadwy); fodd bynnag bydd blaenoriaeth benthyciadau’n cael ei roi i landlordiaid sy’n gallu cynnig yr eiddo fel cartrefi fforddiadwy, cartrefi cymdeithasol neu roi hawliau enwebu i’r Cyngor.

A yw’r gwaith / addasu’n gorfod cael ei wneud i unrhyw fath o safonau? 

Ydi.

Rhaid gwneud yr holl waith yn unol ag unrhyw ganiatâd cynllunio neu gymeradwyaeth rheoli adeiladu a roddwyd ar yr eiddo. Yn ogystal, rhaid i’r eiddo / unedau beidio â chynnwys unrhyw beryglon Categori 1 (risg uchel) ar ôl gorffen y gwaith. Bydd yr Awdurdod Lleol yn gweithio gyda chi i sicrhau cwmpasu’r holl eitemau perthnasol.

A yw’r benthyciadau’n fenthyciadau gwarantedig?

Ydynt. 

Rhaid gwarantu benthyciadau trwy bridiant ariannol cyntaf neu ail gyda’r Gofrestrfa Tir. Os oes morgais presennol ar yr eiddo bydd arnom angen caniatâd y rhoddwyr benthyg i warantu ein pridiant. 

Mae gwarantu’r benthyciadau’n rhoi’r pwerau angenrheidiol i ni dan Ddeddf Cyfraith Eiddo 1925 i adennill unrhyw ddyledion trwy werthu’r eiddo. 

Beth yw’r gyfradd log a’r ffi drefnu ar gyfer y benthyciad?

Mae’r benthyciadau’n ddi-log, ond iddynt gael eu had-dalu. Os digwydd diffygdaliad bydd gweddill y benthyciad yn dod yn ddyledus ar unwaith a bydd llog yn cael ei godi ar gyfradd o 5.5% uwchlaw Cyfradd Sylfaenol Banc Lloegr, yn ôl dogfen eich cytundeb benthyciad. 

Mae un ffi drefnu gysylltiedig â darparu’r benthyciad, fel a ganlyn: 

Am fenthyciadau dros 1 i 3 blynedd, y ffi weinyddol fydd 10%

Am fenthyciadau dros 4 i 10 mlynedd, y ffi weinyddol fydd 15%

Ydw i’n gallu cael unrhyw gymorth gyda threfnu’r gwaith?

Ni allwn roi cymorth uniongyrchol; fodd bynnag i helpu i chi leoli contractwyr i roi dyfynbrisiau i chi am y gwaith arfaethedig mae Cyngor Sir Penfro wedi cynnwys rhestr o gontractwyr a gwblhaodd waith yn ystod y flwyddyn ariannol ddiwethaf ac sydd wedi mynegi diddordeb mewn rhoi cynigion cystadleuol.

Sylwch nad rhestr gymeradwy yw hon ond dim mwy na chyfeiriad i gynorthwyo ceiswyr gyflwyno cais, a bod ceiswyr yn dal yn rhydd i ddewis cael dyfynbrisiau’n annibynnol heb fod yn gyfyngedig i’r rhai a restrwyd.

Pryd fyddaf i’n gorfod ad-dalu’r benthyciad?

Bydd gofyn i chi ddechrau ad-dalu’r benthyciad drwy archeb sefydlog yn ystod y mis llawn cyntaf ar ôl i’r gwaith gael ei ystyried yn gyflawn a bod taliad terfynol y benthyciad wedi’i wneud.

Bydd cyfnod y benthyciad yn cael ei drafod gyda chi ar ddechrau’r cytundeb a bydd angen iddo ystyried taliad lleiaf bob mis. Noder bod cyfnodau ad-dalu yn lleihau’n flynyddol gan fod y cyllid wedi’i fenthyg i’r awdurdod lleol gan Lywodraeth Cymru a bod y cyllid i’w ad-dalu yn 2030.

Mae modd ad-dalu’r benthyciad yn llawn ar unrhyw adeg.

Os byddwch yn methu taliad misol (diffygdaliad benthyciad) bydd y swm llawn yn dod yn ddyledus a bydd llog yn cael ei godi ar y gweddill, ar gyfradd o 5.5% uwchlaw Cyfradd Sylfaenol Banc Lloegr, yn unol â chytundeb eich benthyciad.

Oes yna unrhyw amodau ynghlwm wrth gymeradwyo’r benthyciad?

Oes:

• Dylid cwblhau’r gwaith cyn pen 12 mis ar ôl ei gymeradwyo, oni bai yr awdurdodwyd fel arall.
• Bydd taliadau’n cael eu gwneud yn ôl-weithredol, wedi derbyn Anfoneb, ac ar ôl archwilio’r gwaith. Mae modd gwneud taliadau interim, dan y Polisi Taliadau Interim cyfredol sy’n cael ei weithredu gan Dîm Tai’r Sector Preifat.
• Bydd gofyn ad-daliad llawn o gyllid a roddwyd drwy’r cynllun hwn os bydd teitl yr eiddo’n cael ei drosglwyddo neu’r eiddo’n cael ei werthu.
• Yr Awdurdod Lleol fydd yn pennu maint benthyciadau ac amserlenni ad-dalu ac mae ad-daliadau lleiaf yn berthnasol (£50 y mis i berchen-feddianwyr a £100 y mis i landlordiaid).
• Rhaid i’r ceisydd gytuno i wneud yr ad-daliadau misol trwy drwy archeb sefydlog.
• Ar gyfer holl fenthyciadau bydd Pridiant Cyfreithiol Cofrestrfa Tir yn cael ei gyflwyno a fydd yn rhwymo’r ceisydd ac unrhyw olynwyr mewn teitl.
• Bydd ad-daliadau’n dechrau o’r mis llawn cyntaf ar ôl gwneud y taliad terfynol i; y dyddiad i’w benderfynu gan yr Awdurdod Lleol.
• Os na fydd ad-daliad benthyciad yn cael ei wneud, bydd gweddill y benthyciad yn llawn yn dod yn ddyledus, a bydd llog arno yn ôl dogfen cytundeb y benthyciad.

Beth sydd angen i mi ei ddarparu fel cais cyflawn?

Dylid gwneud cais am gymorth benthyciad ar y ffurflenni a ddarparwyd drwy’r Cynllun Benthyciad Gwella Cartref. Bydd ffurflen gais yn cael ei darparu ar ôl llenwi’r ffurflen mynegi diddordeb, gyda rhagor o gopïau ar gael ar gais. Dylai cais cyflawn gynnwys y canlynol:

• Ffurflen gais am fenthyciad wedi’i chwblhau – mae hon yn gofyn am fanylion yr ymgeisydd a’r eiddo i’w adnewyddu.
• Ffurflen asesu fforddiadwyedd wedi’i chwblhau – mae hon yn gofyn am wybodaeth ariannol sy’n caniatáu cynnal y gwiriad fforddiadwyedd ariannol. I wirio bod yr incwm a’r gwariant a ddatganwyd yn y ffurflen yn gywir, bydd angen i chi gynnwys cyfriflenni banc ar gyfer cyfnod o dri mis ar gyfer pob cyfrif banc.
• Cadarnhad o berchenogaeth yr eiddo. Dylai hyn fel arfer fod yn “gopi swyddogol” a Chynllun Teitl i’w darparu gan Swyddfa Leol y Gofrestrfa Tir, www.cofrestrfatir.gov.uk
• Dau amcangyfrif eitemedig a chost unrhyw ffïoedd cysylltiedig, e.e. ffïoedd peiriannydd adeileddol, neu ffïoedd rheoli prosiectau. Dan amgylchiadau eithriadol, fe all y Cyngor dderbyn un amcangyfrif, pan fo’n briodol gwneud hynny.
• Dogfennau ategol at ddibenion adnabod
• Adroddiad Prisio (gan syrfëwr cymwysedig neu aelod o Sefydliad Brenhinol y Syrfewyr Siartredig - RICS). Mewn achosion lle bo’r eiddo heb forgais arno a thystiolaeth amlwg i gefnogi’r farn bod yr eiddo’n rhoi gwarant ddigonol ac addas ar gyfer y benthyciad, ni fyddgofyn adroddiad prisio.
• Adroddiadau arbenigol, Rheoliadau Adeiladu, Caniatâd Cynllunio a chynlluniau lle bo gofyn.
• Unrhyw fanylion eraill sy’n cael eu hysbysu i’r ceisydd cyn penderfynu a fydd yn cael cynnig benthyciad.
• Caniatâd y rhoddwr benthyg cyntaf, lle bo gofyn.

Beth yw’r broses fenthyca?

Bydd y broses fenthyca yn ei fformat sylfaenol fel a ganlyn:

• Mae perchennog yr eiddo yn cwblhau “ffurflen datganiad o ddiddordeb” ac yn ei dychwelyd drwy’r post neu dros e-bost.
• Mae Cyngor Sir Penfro yn anfon ffurflen gais at berchennog yr eiddo.
• Mae perchennog yr eiddo yn cyflwyno cais am fenthyciad wedi’i gwblhau ynghyd â dogfennaeth ategol, h.y. dyfynbrisiau, cyfriflenni banc, prisiad eiddo ac ati.
• Bydd swyddog Cyngor Sir Penfro yn ymweld â’r eiddo i’w archwilio; cynnal gwiriad fforddiadwyedd.
• Bydd dogfennaeth yn cymeradwyo benthyciad drafft yn cael ei pharatoi i’w hadolygu
• Cymeradwyo’r benthyciad gan Gyngor Sir Penfro.
• Cyflwyno’r cynnig benthyciad i berchennog yr eiddo gan gynnwys cytundeb cyfleuster benthyciad a phridiant cyfreithiol.
• Cofrestru pridiant tir lleol.
• Telir y benthyciad gan Gyngor Sir Penfro yn uniongyrchol i gyfrif banc perchennog yr eiddo ar ôl cwblhau’r gwaith a derbyn anfoneb; gellir ystyried taliadau interim yn dibynnu ar faint y benthyciad.
• Mae ad-daliadau trwy archeb sefydlog yn dechrau mis ar ôl cwblhau’r gwaith.

Mae gennyf ddiddordeb mewn gwneud cais am fenthyciad, beth wnaf i nesaf?

Cysylltwch â Philip Jackson am drafodaeth fer ac, os yw’n berthnasol, i drefnu darparu pecyn cais am fenthyciad.

Ffôn: 01437 775635

e-bost: Philip.jackson@pembrokeshire.gov.uk

Post: Tîm Tai’r Sector Preifat, Cyngor Sir Penfro, 1i Adain y Gogledd, Neuadd y Sir, Hwlffordd, Sir Benfro, SA61 1TP

 

Beth i’w wneud os oes gen i gŵyn

Os hoffech wneud cwyn, cysylltwch â Thîm Tai’r Sector Preifat yn y lle cyntaf. Ar hyn o bryd, y pennaeth tai yw’r rheolwr gwasanaeth sy’n gyfrifol am y tîm a’i henw yw Mrs Gaynor Toft.

Os nad ydych yn fodlon â’r ymateb, dylech gyfeirio at bolisi cwynion Cyngor Sir Penfro, y gellir ei ganfod drwy ymweld â’n gwefan yn

Cwynion – Cyngor Sir Penfro

Fel arall, gallwch gwyno yn ysgrifenedig i’r Swyddog Cyswllt Cwsmeriaid ar gyfer Comisiynu Tai, Cyngor Sir Penfro, Hwlffordd, Sir Benfro SA61 1TP.

Os byddai’n well gennych, gallwch ffonio 01437 764551 neu anfon eich cwyn drwy e-bost i complaintscontactofficers@pembrokeshire.gov.uk.