Teithio Llesol yn Sir Benfro

Mapiau o’r rhwydwaith teithio llesol

Ymgynghoriad ar Fap Rhwydwaith Teithio Llesol – Cam 2

Yn dilyn ymgynghoriad statudol 12 wythnos, a ddaeth i ben ym mis Ebrill eleni, mae deddfwriaeth yn ei gwneud yn ofynnol i gynghorau roi cyfle i’r cyhoedd gadarnhau bod eu barn wedi cael ei hystyried yn briodol. Mae’r ymgynghoriad hwn yn cynrychioli’r cam nesaf hwnnw.

Rydym yn gofyn am eich adborth ar y canlynol:

• A ydym wedi nodi llwybrau newydd posibl priodol?
• A ydym wedi nodi'n gywir y llwybrau presennol y gellid eu gwella?
• A ydym yn gywir yn ein hasesiad o’r llwybrau sydd eisoes yn bodloni’r safonau y cytunwyd arnynt (y llwybrau presennol)?

Mae’r ymgynghoriad yn canolbwyntio ar y prif drefi a phentrefi yn Sir Benfro, sydd wedi’u dethol gan Lywodraeth Cymru fel lleoliadau dynodedig y sir. Y rhain yw: Abergwaun / Wdig, Penfro, Doc Penfro, Dinbych-y-pysgod, Saundersfoot (Llanusyllt), Hwlffordd, Neyland, Aberdaugleddau, Johnston, Arberth a Llandudoch.

Sylwch nad yw’r ymgynghoriad hwn yn cynnwys materion sy’n ymwneud â hawliau tramwy cyhoeddus nac unrhyw faterion priffyrdd nad ydynt yn gysylltiedig â cherdded, teithio ar olwynion neu beicio gan nad yw’r rhain wedi’u cynnwys yn yr adolygiad o’r map rhwydwaith teithio llesol.

Gallwch gymryd rhan yn yr ymarfer ymgynghori ar-lein drwy ein hofferyn mapio rhyngweithiol, sy’n cael ei letya gan Fap Data Cymru sy’n dod o dan awdurdodaeth Llywodraeth Cymru.

Ymgynghoriad Map Rhwydwaith Teithio Egnïol – Cam 2 (yn agor mewn tab newydd)

 

Mae’r map rhyngweithiol yn caniatáu i gyfranogwyr weld ein llwybrau arfaethedig, a elwir yn llwybrau’r dyfodol neu lwybrau presennol sydd wedi’u newid o ganlyniad i’r ymgynghoriad cychwynnol a rhoi sylwadau ynghylch a yw’r llwybrau hyn yn adlewyrchu’r hyn yr hoffech ei weld yn cael ei gyflwyno neu ei wella.

 

Bydd yr ymgynghoriad yn cychwyn ddydd Llun, 3 Awst 2026 ac yn cau ddydd Llun, 28 Medi 2026.

 

Mae copïau papur ar gael ar gais drwy gysylltu â'r tîm yn y cyfeiriad e-bost isod.  Sylwch, oherwydd yr ardal helaeth a gwmpesir, mai dim ond cynlluniau copi caled ar gyfer yr ardal benodol o fewn eich cylch gwaith y gallwn eu darparu. Os bydd unrhyw gyfranogwyr yn dymuno cymryd rhan yn yr ymgynghoriad drwy fformat gwahanol, gofynnwn yn garedig i geisiadau gael eu cyflwyno i'r tîm cyn gynted â phosibl.

 

Os oes gennych unrhyw gwestiynau, anfonwch e-bost at y Tîm Strategaeth Trafnidiaeth

 

 

Trosolwg o’r Ymgynghoriad ar Fapio’r Rhwydwaith Teithio Llesol – Cam 1

Yn dilyn y broses ymgynghori gyhoeddus, a ddaeth i ben ym mis Ebrill 2026, mae’r holl sylwadau a ddaeth i law wedi’u casglu’n themâu allweddol. Mae’r rhain wedi’u nodi yn y tabl isod, ochr yn ochr ag ymatebion y cyngor er hwylustod cyfeirio.

Mae’r holl bryderon a godwyd wedi’u rhannu â’r timau perthnasol i’w hymchwilio. Oherwydd y lefel sylweddol o adborth a daeth i law yn ystod yr ymgynghoriad hwn, nid yw wedi bod yn bosibl cyflwyno pob sylw unigol. Fodd bynnag, os hoffech gael adborth penodol yn ymwneud ag unrhyw un o’r aneddiadau a restrir isod, cysylltwch â’r tîm drwy e-bost a gellir darparu copi i chi:

• Abergwaun / Wdig
• Hwlffordd
• Johnston / Aberdaugleddau
• Neyland
• Penfro
• Doc Penfro
• Saundersfoot
• Dinbych-y-pysgod
• Llandudoch

Bydd ail gam yr ymgynghoriad yn digwydd yn ddiweddarach eleni i gadarnhau a yw’r holl lwybrau arfaethedig y dyfodol wedi’u nodi. Bydd rhagor o fanylion ar gael ar y dudalen we hon maes o law.

Thema	Eich pryderon a’ch sylwadau	Ein camau gweithredu	Trefi sy’n cael eu heffeithio
Hygyrchedd a mynediad cynhwysol	Mae’r palmentydd yn rhy gul i symud cadeiriau olwyn/pramiau Dim cyrbau isel Diffyg canllawiau a seilwaith hygyrch	Cydnabyddir problemau hygyrchedd a byddant yn cael eu harchwilio  Comisiynu ymchwiliadau i ganllawiau Asesu llwybrau’r dyfodol yn erbyn safonau ar gyfer addasrwydd	Abergwaun, Hwlffordd, Aberdaugleddau, Arberth, Penfro, Saundersfoot, Llandudoch, Dinbych-y-pysgod
Diogelwch ffyrdd a chyflymder traffig	Cyflymder traffig gormodol Croesfannau peryglus  Gwelededd gwael wrth gyffyrdd	Wedi’i gyfeirio at yr adran draffig Wedi’i anfon at yr Asiantaeth Cefnffyrdd lle bo’n berthnasol Wedi’i gynnwys mewn asesiadau diogelwch yn y dyfodol	Hwlffordd, Pontfadlen, Aberdaugleddau, Arberth, Saundersfoot, Doc Penfro, Llandudoch
Bylchau yn y seilwaith cerdded a beicio	Dim llwybrau beicio Diffyg llwybrau troed ar ffyrdd prysur Cysylltedd gwael rhwng cymunedau	Ychwanegu llwybrau’r dyfodol at fap y rhwydwaith a’u hasesu yn erbyn safonau ar gyfer addasrwydd  Comisiynu astudiaethau dichonoldeb Wedi’i gynnwys yn y broses flaenoriaethu	Ar draws y sir
Gwaith cynnal a chadw a chyflwr yr arwynebau	Arwynebau anwastad Tyllau yn y ffordd Llwybrau sy’n dirywio	Wedi’i gyfeirio at dimau cynnal a chadw Archwiliadau yn cael eu cynnal ar y llwybrau presennol ar hyn o bryd	Ar draws y sir
Llystyfiant a rhwystrau ar y llwybrau	Llystyfiant sydd wedi gordyfu Llwybrau wedi’u blocio Cyfyngiadau gwelededd	Cyfeiriwyd at yr adran Hawliau Tramwy Cyhoeddus ar gyfer gwaith cynnal a chadw Archwiliadau yn cael eu cynnal ar y llwybrau presennol ar hyn o bryd	Ar draws y sir
Goleuadau a diogelwch personol	Goleuadau gwael Pryderon diogelwch ar ôl tywyllu Llwybrau heb eu goleuo	Wedi’i ystyried yng nghynlluniau’r dyfodol Ychwanegwyd at restr archwiliadau llwybrau	Hwlffordd, Arberth, Penfro, Saundersfoot
Parcio ar y palmant a cherbydau’n rhwystro tramwy	Ceir yn rhwystro palmentydd Mynedfeydd llwybrau wedi’u rhwystro Cerddwyr yn cael eu gorfodi i’r ffordd	Atgyfeiriadau ar gyfer gorfodi’r gyfraith I’w drafod yn ystod archwiliadau Cynghorir rhoi gwybod i’r heddlu	Hwlffordd, Aberdaugleddau, Penfro, Doc Penfro, Saundersfoot
Gwelliannau i groesfannau a chyffyrdd	Croesfannau anodd Offer croesi diffygiol Cyffyrdd anniogel	I’wcyfeirio at beirianwyr Wedi’u cynnwys mewn pecynnau teithio llesol Yn cael eu hasesu	Hwlffordd, Pontfadlen, Arberth, Doc Penfro
Glendid a materion amgylcheddol	Baw cŵn Sbwriel Tipio anghyfreithlon	Wedi’i gyfeirio at adrannau’r cyngor Ystyried biniau ychwanegol Gofynnwyd am gymryd camau gorfodi’r gyfraith	Wdig, Aberdaugleddau, Penfro, Saundersfoot
Draenio a llifogydd	Dŵr llonydd Llwybrau sy’n dueddol o ddioddef llifogydd Draeniad gwael	Atgyfeiriadau cynnal a chadw Adolygiadau draenio Ystyried llifogydd wrth gynllunio llwybrau	Abergwaun, Arberth, Llandudoch, Dinbych-y-pysgod
Trafnidiaeth gyhoeddus a chysylltedd	Angen am wasanaethau bysiau gwell Integreiddio gwael â llwybrau Pryderon ynghylch hygyrchedd gorsafoedd	Cysylltu â thimau trafnidiaeth Cofnodi pryderon ynghylch gwasanaethau Hygyrchedd i’w adolygu	Hwlffordd, Aberdaugleddau, Llandudoch
Arwyddion a chanfod y ffordd	Dim arwyddion Anodd canfod y ffordd  Angen am farciau llwybr	Ymchwilio i adolygu arwyddion  Archwiliadau llwybrau wedi’u rhaglennu Mesurau gwella i’w nodi	Pontfadlen, Doc Penfro, Llandudoch
Datblygu a blaenoriaethu llwybrau yn y dyfodol	Ceisiadau am lwybrau newydd Cysylltiadau ysgol mwy diogel Ehangu’r rhwydwaith	Ychwanegwyd at y map teithio llesol Wedi’i gynnwys yn y broses flaenoriaethu Cyfleoedd ariannu yn y dyfodol i’w harchwilio	Ar draws y sir
Dichonoldeb cynllunio, tir a llwybrau	Pryderon tir preifat Cyfyngiadau llifogydd Gwrthwynebiadau amgylcheddol/rheilffyrdd	Adolygiadau dichonoldeb i’w cynnal Rhai llwybrau wedi’u tynnu Archwilio dewisiadau eraill	Aberdaugleddau, Penfro, Dinbych-y-pysgod

 

Mae Cyngor Sir Penfro yn cynnal ymgynghoriad i gasglu adborth ar ofynion teithio llesol yn y sir.

O dan Ddeddf Teithio Llesol (Cymru) 2013, mae'n ofynnol yn ôl y gyfraith i bob awdurdod lleol yng Nghymru baratoi a chynnal mapiau o’r rhwydwaith teithio llesol. Mae'r mapiau hyn yn cefnogi’r gwaith o gynllunio, cyflawni a chyllido cynlluniau teithio llesol, gan helpu i greu rhwydwaith mwy integredig, hygyrch a chynaliadwy ar gyfer teithio ar droed, ar olwyn ac ar feic dros gyfnod o dair i bum mlynedd. Cafodd ein map presennol ei gymeradwyo gan Lywodraeth Cymru yn 2022 ac mae'n bryd nawr adlewyrchu'r newidiadau a'r gwelliannau dros y tair blynedd diwethaf.

Mae'r ymgynghoriad yn ceisio:

• Ymgysylltu â chymunedau lleol a’u cynnwys wrth nodi'r llwybrau teithio llesol pwysicaf y mae angen eu gwella neu eu datblygu.
• Asesu ymarferoldeb ac effeithiolrwydd llwybrau presennol i sicrhau eu bod yn adlewyrchu profiad y defnyddiwr ac yn cyd-fynd â datblygiadau cyfredol a datblygiadau yn y dyfodol.
• Hyrwyddo teithio llesol ac annog trigolion i fabwysiadu dulliau teithio cynaliadwy ar gyfer teithiau bob dydd, gan leihau dibyniaeth ar gerbydau modur preifat.

Mae'r ymgynghoriad yn canolbwyntio ar y prif drefi a phentrefi yn Sir Benfro, sydd wedi'u dethol gan Lywodraeth Cymru fel lleoliadau dynodedig y sir. Mae'r rhain fel a ganlyn:

• Abergwaun / Wdig
• Hwlffordd
• Johnston
• Aberdaugleddau
• Neyland
• Doc Penfro
• Penfro
• Dinbych-y-pysgod
• Saundersfoot
• Arberth
• Llandudoch (mae hyn o fewn ffin anheddiad Aberteifi ond o fewn ardal weinyddol Cyngor Sir Penfro)

 

 Gweld y map o’r rhwydwaith teithio llesol

• Llwybrau presennol – dyma'r llwybrau sy'n bodloni safonau Llywodraeth Cymru ar gyfer teithio llesol (ar droed, ar olwyn ac ar feic) ar hyn o bryd.
• Llwybrau’r dyfodol – nodwyd y llwybrau hyn yn ystod ymgynghoriadau blaenorol neu roedd angen gwelliannau arnynt i wella cysylltedd cyffredinol y rhwydwaith.

Gallwch weld map o’r sir i gyd drwy’r ddolen hon:Platfform MapDataCymru (yn agor mewn tab newydd)

 

Manylion yr ymgynghoriad

Bydd yr ymgynghoriad statudol 12 wythnos hwn yn rhedeg o 26 Ionawr 2026 i 20 Ebrill 2026. 

Gallwch gymryd rhan yn yr ymarfer ymgynghori (yn agor mewn tab newydd) ar-lein drwy ein hofferyn mapio rhyngweithiol, sy’n cael ei letya gan Fap Data Cymru sy'n dod o dan awdurdodaeth Llywodraeth Cymru.

Cynhelir sesiynau galw heibio yn y lleoliadau canlynol, lle bydd cynrychiolwyr o Gyngor Sir Penfro yn bresennol i ateb unrhyw gwestiynau a allai godi. Oherwydd oriau agor y lleoliadau, sylwer nad ydym yn gallu mynychu yn hwyrach na'r amseroedd a bennir.

5 Chwefror

• Doc Penfro – Llyfrgell Doc Penfro, 10:00 – 13:00
• Penfro – Cyngor Tref Penfro, 14:30 – 17:30

11 Chwefror

• Wdig – Caffi Ocean Lab, 10:00 – 13:00
• Abergwaun – Llyfrgell Abergwaun, 14:00 – 17:00 

24 Chwefror

• Neyland – Llyfrgell Neyland, 10:00 – 13:00
• Johnston – Eglwys Bedyddwyr Johnston, 14:00 – 18:00

 26 Chwefror

• Arberth – Llyfrgell Arberth, 14:00 – 17:00 

4 Mawrth

• Aberdaugleddau – Llyfrgell Aberdaugleddau, 10:00 – 13:00 

5 Mawrth

• Dinbych-y-pysgod – Cyngor Tref Dinbych-y-pysgod, 09:30 – 12:30
• Saundersfoot – Neuadd Regency, 13:30 – 17:30 

16 Mawrth

• Hwlffordd – HaverHub, 14:00 – 18:00 

18 Mawrth

• Llandudoch – Neuadd Goffa Llandudoch, 14:00 – 18:00 

 

Mae copïau papur ar gael ar gais drwy gysylltu â'r tîm yn y cyfeiriad e-bost isod.  Sylwch, oherwydd yr ardal helaeth a gwmpesir, mai dim ond cynlluniau copi caled ar gyfer yr ardal benodol o fewn eich cylch gwaith y gallwn eu darparu. Os bydd unrhyw gyfranogwyr yn dymuno cymryd rhan yn yr ymgynghoriad drwy fformat gwahanol, gofynnwn yn garedig i geisiadau gael eu cyflwyno i'r tîm cyn gynted â phosibl.

Am ragor o wybodaeth am Deithio Egnïol yn Sir Benfro.

Os oes gennych unrhyw gwestiynau, anfonwch e-bost at y Tîm Strategaeth Trafnidiaeth.