Cronfa Pysgodfeydd Ewrop

Grŵp Gweithredu Lleol Pysgodfeydd O'r Cleddau i'r Glannau

Mae Grŵp Gweithredu Lleol Pysgodfeydd O'r Cleddau i'r Glannau yn gweithredu yn ardal awdurdod Sir Benfro. Prif amcan y Grŵp yw cynnal gweithgareddau dan arweiniad y gymuned er mwyn ceisio gwella cynaliadwyedd economaidd ac amgylcheddol diwydiant pysgota Sir Benfro. Byddai hefyd yn hoffi sicrhau bod llais a lles cymunedau pysgota yn cael eu deall a'u hyrwyddo. Mae'r Grŵp yn awyddus i gwrdd â phobl sy'n gysylltiedig ag unrhyw elfen o gymuned bysgota, er mwyn clywed eu barn am anghenion eu cymuned a thrwy hynny gynnig syniadau a phrosiectau y gallai'r Grŵp eu cefnogi a buddsoddi ynddynt.

Nod Cyffredinol y Grŵp Gweithredu Lleol Pysgodfeydd

Mae Grŵp Gweithredu Lleol Pysgodfeydd O'r Cleddau i'r Glannau (y Grŵp) yn gweithredu yn ardal Sir Benfro. Mae'r Grŵp yn awyddus i wella cydberthnasau rhwng sectorau gwahanol sy'n gysylltiedig â physgodfeydd drwy eu hannog i gymryd rhan mewn prosiectau cydweithredol. Nod cyffredinol y Grŵp yw: “Helpu diwydiant pysgota Sir Benfro i wella ei gynaliadwyedd economaidd ac amgylcheddol drwy ychwanegu gwerth, arallgyfeiro a chydweithio, a sicrhau y caiff llais a lles cymunedau pysgota eu deall a'u hyrwyddo”.

Amcanion y Grŵp:

Mae amcanion y Grŵp yn rhoi syniad o'r math o brosiectau/gweithgareddau y gellir defnyddio cyllid y Grŵp i'w hariannu:

Ychwanegu gwerth at gynhyrchion pysgodfeydd a dyframaeth – Cynyddu gwerth cynhyrchion pysgodfeydd Sir Benfro fel eu bod yn sicrhau pris uwch ar y farchnad.
Lleihau cost cynhyrchu cynhyrchion pysgodfeydd a dyframaeth – Lleihau costau gweithredu diwydiant pysgota Sir Benfro er mwyn helpu i gynyddu proffidioldeb ac incwm busnesau. Hefyd, lleihau'r costau amgylcheddol sy'n gysylltiedig â physgota a/neu weithgareddau prosesu pysgod.
Arallgyfeirio incwm cymunedau pysgota – Gwella cynaliadwyedd economaidd busnesau a chynyddu incwm unigolion drwy eu helpu i amrywio eu ffynonellau incwm, a hynny o fewn y diwydiant pysgota neu'r tu hwnt iddo.
Sicrhau budd i rywogaethau targed – Cydnabod bod dyfodol y diwydiant pysgota yn dibynnu ar stociau iach o rywogaethau targed. Felly, gellir mynd i'r afael â materion amgylcheddol drwy'r amcan hwn.
Codi proffil pysgota yn Sir Benfro – Annog pobl i fwyta bwyd môr lleol, a thrwy hynny gynyddu'r galw amdano a'i farchnadwyedd. Tynnu sylw at bysgota fel gyrfa bosibl (o ganlyniad i weithlu sy'n heneiddio).

Hefyd, helpu i sicrhau bod llais cymunedau pysgota yn cael ei glywed mewn datblygiadau lleol ac economaidd (yn enwedig mewn gweithgareddau pysgodfeydd a dyframaeth).

Noder: Nid oes amcan penodol i hyrwyddo cyfleoedd i feithrin sgiliau; gellid cynnwys addysg a sgiliau mewn unrhyw amcan penodol.

Cymhwysedd am gyllid gan y Grŵp Gweithredu Lleol Pysgodfeydd – beth y gall y Grŵp fuddsoddi ynddo?

Nid yw'r Grŵp Gweithredu Lleol Pysgodfeydd yn gynllun grant (h.y. ni all unigolion wneud cais am grantiau/cyllid ar gyfer eu hanghenion penodol). Yn lle hynny, bydd Cyngor Sir Penfro yn cynnal prosiectau (neu weithgareddau) ar ran y Grŵp a, lle y bo angen, yn gwahodd unigolion/sefydliadau i dendro am brosiectau penodol. Dylai'r prosiectau sicrhau budd i gymunedau a/neu grwpiau, yn hytrach nag i unigolion.

Gweler isod wybodaeth am yr hyn sy'n gymwys am gyllid gan y Grŵp, ac am y modd y gellir defnyddio'r cyllid hwnnw:

Rhaid i brosiectau gyflawni un neu fwy o amcanion penodol y Grŵp.
Dylai'r prosiectau gynnwys nodwedd(ion) arloesol.
Ni all y Grŵp ariannu darnau mawr o gyfarpar – e.e. eitemau unigol sy'n costio mwy na £10,000, eitemau ac iddynt oes ddefnyddiol o fwy na blwyddyn, neu eitemau y mae tâl dibrisiant blynyddol yn gysylltiedig â nhw.
Nid oes uchafswm gwerth ariannol llym ar gyfer prosiect a ariennir gan y Grŵp – fodd bynnag, rhoddir ystyriaeth ofalus i brosiectau sy'n costio mwy na £25,000.
Gall y Grŵp ariannu hyd at 100% o werth prosiect.
Gellir defnyddio cyllid y Grŵp fel arian cyfatebol ar gyfer prosiectau eraill nad ydynt yn cael eu hariannu gan yr UE.
Gellir defnyddio cyllid y Grŵp i gefnogi nifer o agweddau ar gymunedau pysgota – nid yw'r cyllid yn gyfyngedig i bysgotwyr a physgodfeydd.
Rhaid i brosiectau'r Grŵp gael eu cymeradwyo am gyllid gan bob aelod o fwrdd y Grŵp.

Noder: Mae'r Grŵp yn awyddus i glywed am unrhyw brosiectau posibl sy'n gysylltiedig â physgodfeydd (ni waeth a ydynt yn bodloni meini prawf y Grŵp ai peidio), gan y gallai fod cyfleoedd eraill am gyllid ar gael.

Am ragor o wybodaeth, cysylltwch â thîm Grŵp Gweithredu Lleol Pysgodfeydd O'r Cleddau i'r Glannau:

E-bost: FLAG@pembrokeshire.gov.uk Ffôn: 01437 775790

Facebook: FLAG Pembrokeshire

Hysbysiad Preifatrwydd: Os byddwch yn ymwneud â'r Grŵp Gweithredu Lleol Pysgodfeydd, efallai y caiff eich manylion cyswllt (a gwybodaeth bersonol arall) eu cofnodi a'u storio ar gronfa ddata. Caiff y gronfa ddata hon ei defnyddio i rannu gwybodaeth am weithgareddau'r Grŵp. Ni fydd y Grŵp yn rhannu eich manylion cyswllt â thrydydd partïon.

Uned Ewropeaidd