Y Tîm Integredig Cymorth i Deuluoedd - Gwybodaeth i Deuluoedd
Gwasanaeth Integredig Cymorth i Deuluoedd - Tîm Ar Ffiniau Gofal
Mae'r Tîm Ar Ffiniau Gofal yn rhan o Wasanaeth Integredig Cymorth i Deuluoedd Cyngor Sir Penfro. Rydym yn gweithio gyda phlant, pobl ifanc a theuluoedd sy'n wynebu heriau a allai roi plant mewn perygl o fynd i mewn i ofal. Ein nod yw helpu plant i barhau yn ddiogel yn eu rhwydweithiau teuluol lle bynnag y bo modd. Rydym yn darparu cefnogaeth ddwys, sy'n seiliedig ar dystiolaeth, wedi'i theilwra i gryfderau, anghenion ac amgylchiadau unigryw pob teulu.
Gan weithio ochr yn ochr â theuluoedd, rydym yn canolbwyntio ar feithrin gwydnwch, gwella perthnasoedd a diogelwch a chefnogi newid cadarnhaol yn yr hirdymor. Pan fydd plentyn neu unigolyn ifanc wedi mynd i ofal, efallai y byddwn hefyd yn cefnogi cynlluniau ar gyfer ei ddychwelyd adref mewn modd diogel a chynaliadwy pan fo hyn er ei fudd pennaf.
Sut rydym yn cefnogi teuluoedd
Gall y gefnogaeth a ddarperir gan y Tîm Ar Ffiniau Gofal gynnwys:
- Cefnogaeth ddwys i deuluoedd ac ymyrraeth.
- Cymorth ymarferol ac emosiynol i rieni, gofalwyr, plant a phobl ifanc.
- Cryfhau perthnasoedd teuluol a chyfathrebu.
- Cefnogi teuluoedd i reoli gwrthdaro a sefyllfaoedd heriol.
- Rhoi teuluoedd mewn cysylltiad â’u teulu ehangach a chefnogaeth yn y gymuned.
- Datblygu cynlluniau a strategaethau diogelwch i wella llesiant.
- Cefnogi plant a phobl ifanc sydd mewn perygl o orfod wynebu chwaliad teuluol neu fynd i ofal gyda'r nod o atal hyn lle bo'n ddiogel i wneud hynny.
Mae ein dull yn seiliedig ar gryfderau, yn gydweithredol ac yn canolbwyntio ar sicrhau canlyniadau cadarnhaol i blant a'u teuluoedd.
Lle rydym wedi'n lleoli
Mae'r Tîm Ar Ffiniau Gofal wedi'i leoli yn Neuadd y Sir yn Hwlffordd ac mae'n darparu cefnogaeth i deuluoedd ledled Sir Benfro.
Cael mynediad at ein cefnogaeth
Gwneir atgyfeiriadau i'r Tîm Ar Ffiniau Gofal gan weithwyr cymdeithasol y gwasanaethau plant sy'n cefnogi teuluoedd. Os ydych chi'n gweithio gyda gweithiwr cymdeithasol Gwasanaethau Plant Sir Benfro ar hyn o bryd, gallwch siarad â nhw i ddarganfod a allai cefnogaeth gan y Tîm Ar Ffiniau Gofal fod yn addas i'ch teulu chi.
Os nad ydych yn cael eich cefnogi gan weithiwr cymdeithasol ar hyn o bryd ond yn pryderu am blentyn, neu'n teimlo bod angen cymorth arnoch chi fel teulu, cysylltwch â'r Tîm Asesu Gofal Plant ar 01437 776444.
I siarad ag aelod o Dîm Ar Ffiniau Gofal y Gwasanaeth Integredig Cymorth i Deuluoedd, ffoniwch 01437 764551.
Ein Nod
Cefnogi plant i barhau yn ddiogel gyda'u teuluoedd, gwella llesiant, a helpu teuluoedd i wneud newid cadarnhaol, parhaol.